TSSE Täzelikler

        2026-njy ýylyň 2-nji oktýabrynda Aşgabat şäherinde iki günüň dowamynda geçirilen Türkmenistanyň Maýa goýum forumy – 2026 (TIF 2026) öz işini tamamlady. Ýurdumyzda halkara maýa goýum hyzmatdaşlygyny ösdürmäge, täze işewür gatnaşyklary ýola goýmaga we geljegi uly taslamalary durmuşa geçirmäge gönükdirilen forum möhüm halkara işewürlik meýdançasyna öwrüldi.

         Forumyň dowamynda döwlet edaralarynyň, halkara maliýe guramalarynyň, daşary ýurtly kompaniýalaryň hem-de işewür toparlaryň wekilleri Türkmenistanyň ykdysadyýetiniň ileri tutulýan ugurlary boýunça pikir alyşdylar. Maksatnamanyň çäklerinde ykdysadyýeti diwersifikasiýalaşdyrmak, halkara maliýe hyzmatdaşlygy, sanly ykdysadyýet, maliýe tehnologiýalary, innowasiýalar, “ýaşyl” özgertmeler, maýa goýumlaryň hukuk taýdan düzgünleşdirilişi ýaly möhüm ugurlara bagyşlanan mejlisler geçirildi.

         TIF 2026-nyň çäklerinde geçirilen ikitaraplaýyn duşuşyklarda özara bähbitli hyzmatdaşlygyň täze ugurlary ara alnyp maslahatlaşyldy. Şeýle hem Türkmenistanyň döwlet edaralary we hususy kärhanalary bilen daşary ýurtly hyzmatdaşlaryň arasynda hyzmatdaşlygyň dürli ugurlaryna degişli birnäçe möhüm resminamalara gol çekildi.

       Forumyň jemleri Türkmenistanyň halkara maýa goýum hyzmatdaşlygyny giňeltmäge, täze işewür gatnaşyklary pugtalandyrmaga hem-de geljegi uly maýa goýum taslamalaryny durmuşa geçirmek üçin netijeli dialogy dowam etdirmäge bolan gyzyklanmasynyň ýokarydygyny görkezdi.

         Türkmenistanyň Maýa goýum forumy – 2026 halkara hyzmatdaşlygyň täze mümkinçiliklerini ara alyp maslahatlaşýan, özara bähbitli işewür gatnaşyklary ösdürýän möhüm meýdança hökmünde öz işini üstünlikli tamamlady.

Türkmenistanyň Söwda-senagat edarasynyň

Metbugat gullugy.