TSSE Täzelikler

       2026-njy ýylyň 25-nji sentýabrynda Türkmenistanyň Söwda-senagat edarasynyň ýolbaşçysy Indoneziýa Respublikasynyň Türkmenistandaky Adatdan daşary we Doly ygtyýarly ilçisi jenap Rolliansýah Soemiratyň ýolbaşçylygyndaky wekiliýet bilen duşuşyk geçirdi.

         Duşuşyk Indoneziýa Respublikasynyň wekiliýetiniň ýurdumyza amala aşyrýan iş saparynyň çäklerinde geçirildi. Saparyň esasy maksady Türkmenistanyň Garaşsyzlygynyň 35 ýyllygy mynasybetli Aşgabat şäherinde geçiriljek dabaraly çärelere gatnaşmak, şeýle hem türkmen-indonez gatnaşyklarynyň söwda-ykdysady ugurlary boýunça hyzmatdaşlygyň geljekki mümkinçiliklerini ara alyp maslahatlaşmakdan ybarat boldy.

         Duşuşygyň dowamynda Türkmenistan bilen Indoneziýanyň arasynda söwda-ykdysady gatnaşyklary ösdürmegiň, işewür toparlaryň arasynda göni gatnaşyklary pugtalandyrmagyň, özara söwda dolanyşygynyň möçberini artdyrmagyň hem-de täze bilelikdäki başlangyçlary durmuşa geçirmegiň mümkinçilikleri barada pikir alşyldy.

         Şeýle hem iki ýurduň telekeçileriniň arasynda işewür gatnaşyklary giňeltmekde Türkmenistanyň Söwda-senagat edarasynyň we Indoneziýanyň degişli işewür düzümleriniň hyzmatdaşlygynyň ähmiýeti bellenildi. Sergileriň, işewürlik maslahatlarynyň we B2B duşuşyklarynyň geçirilmeginiň özara bähbitli gatnaşyklary täze derejä çykarmaga ýardam berjekdigi nygtaldy.

         Duşuşykda taraplar türkmen-indonez hyzmatdaşlygynyň bar bolan mümkinçiliklerini netijeli peýdalanmak, ikitaraplaýyn söwda-ykdysady gatnaşyklary mundan beýläk-de ösdürmek we täze ugurlarda özara bähbitli hyzmatdaşlygy ýola goýmak boýunça gyzyklanmalaryny beýan etdiler.

         Duşuşyk özara hormat, ynanyşmak we netijeli hyzmatdaşlyk ýörelgelerine esaslanýan türkmen-indonez gatnaşyklaryny täze mazmun bilen baýlaşdyrmakda möhüm ädim boldy.

Türkmenistanyň Söwda-senagat edarasynyň

Metbugat gullugy.