TSSE Täzelikler

2023-nji ýylyň 6-njy dekabrynda Türkmenistanyň Söwda-senagat edarasynyň döwrebap binasynda açylan Türkiýe Respublikasynyň eksport harytlarynyň sergisiniň çäklerinde Türkmen-türk işewürler maslahaty geçirildi.

 Oňa türk işewürleri bilen bir hatarda Türkmenistanyň Senagatçylar we telekeçiler birleşmesiniň agzalary bolan köp sanly telekeçiler gatnaşdylar.

Maslahatyň başynda Türkmenistanyň Ministrler Kabinetiniň Başlygynyň orunbasary Batyr Atdaýew we Türkiýe Respublikasynyň Wise-Prezidenti Jewdet Ýylmaz çykyş edip, iki ýurduň işewürlerini has ysnyşykly gatnaşyklary ýola goýmaga çagyrdy.

Maslahatyň dowamynda iki dostlukly ýurduň dürli pudaklaýyn edaralarynyň hem-de işewür toparlarynyň wekilleriniň arasynda duşuşyklar geçirilip, olaryň barşynda täze gatnaşyklar ýola goýuldy we degişli resminamalara gol çekildi.

Türkmen-türk işewürler maslahatynyň ahyrynda oňa gatnaşyjylar iki ýurduň ykdysady kuwwaty hem-de hyzmatdaşlygyň geljegi barada pikir alyşmalar geçirilen ýokary derejedäki duşuşygy guramaga döredilen mümkinçilik üçin hormatly Prezidentimiz Serdar Berdimuhamedowa tüýs ýürekden hoşallyk bildirdiler.

Türkmenistanyň Söwda-senagat edarasynyň

  Metbugat gullugy.