TSSE Täzelikler

2024-nji ýylyň 15-nji iýulynda Özbegistanyň paýtagty Daşkent şäherinde Türkmen-özbek işewürler geňeşiniň dördünji mejlisi geçirildi. Oňa Türkmenistanyň we Özbegistanyň söwda-senagat edaralarynyň ýolbaşçylarynyň başlyklyk etmegindäki wekiliýet toparlary gatnaşdylar.

Mejlisiň barşynda iki ýurduň arasynda söwda-ykdysady gatnaşyklary mundan beýläk-de giňeltmegiň ugurlaryna garaldy. Şunda hususan-da, hususy önüm öndürijileriň ugry boýunça, şeýle hem energetika, ulag-logistika, oba hojalygy, derman senagaty we syýahatçylyk ulgamlarynda ägirt uly mümkinçilikleriň bardygy bellenildi.

Işewürler geňeşiniň nobatdaky mejlisine gatnaşýan wekiliýet toparlarynyň ýolbaşçylarynyň belleýşi ýaly, soňky ýyllarda iki goňşy ýurduň arasynda söwda-ykdysady gatnaşyklar gyzyklanma bildirilýän giň ugurlarda depginli ösdürilýär. Yzygiderli ýokarlanýan söwda dolanyşygynyň möçberleri munuň şeýledigine aýdyň şaýatlyk edýär.

Mejlisiň dowamynda taraplar söwda-senagat edaralarynyň arasyndaky hyzmatdaşlygy has-da işjeňleşdirmegiň mümkinçiliklerini maslahatlaşdylar. Şeýle hem Türkmenistanyň we Özbegistanyň döwlet hem-de hususy edara-kärhanlarynyň wekilleriniň arasynda özara işewürlik gepleşikleri geçirildi.

Türkmenistanyň Söwda-senagat edarasynyň

Metbugat gullugy.