TSSE Täzelikler

2024-nji ýylyň 12-nji oktýabrynda Türkmenistanyň Söwda-senagat edarasynyň guramagynda Aşgabatda ilkinji gezek Türkmen-mongol işewürler maslahaty geçirildi. «Mizan» täjirçilik merkezinde geçirilen bu işewürler maslahatynyň maksady Türkmenistan bilen Mongoliýanyň işewürleriniň arasyndaky söwda-ykdysady, önümçilik, farmasewtika-lukmançylyk, ulag-logistika, oba hojalygy, azyk önümçiligi we gaýtadan işlemek ýaly ugurlar boýunça ikitaraplaýyn gatnaşyklary ýola goýmakdan we ösdürmekden ybarat boldy.

Türkmenistanyň ministrlikleriniň we pudak-edaralarynyň wekilleriniň, Türkmenistanyň Söwda-senagat edarasynyň hem-de Türkmenistanyň Senagatçylar we telekeçiler birleşmesiniň agzalarynyň, Mongoliýanyň ministrlikleriniň we pudaklaýyn dolandyryş edaralarynyň hem-de Mongoliýanyň Milli söwda-senagat edarasynyň wekilleriniň gatnaşan Türkmen-mongol işewürler maslahaty işjeň häsiýete eýe boldy.

Umumy plenar mejlisiniň geçirilmegi bilen başlanan bu çäre Türkmenistan bilen Mongoliýanyň arasyndaky hyzmatdaşlygy ösdürmek: iki ýurduň eksport-import we maýa goýum mümkinçiliklerine hem-de türkmen we mongol işewürler toparynyň arasynda hyzmatdaşlygyň mümkinçilikleri: Türkmenistan bilen Mongoliýanyň ulag we logistika pudagyndaky mümkinçiliklerine bagyşlanan iki bölüm boýunça dowam etdirildi. Türkmen-mongol işewürler maslahatynda oňa gatnaşan iki ýurduň wekilleriniň birnäçesiniň çykyşlaryna orun berildi. Çykyşlarda Türkmenistan bilen Mongoliýanyň arasyndaky söwda-ykdysady gatnaşyklary pugtalandyrmaga, iki ýurduň işewürler toparlarynyň arasynda uzakmöhletleýin özara bähbitli gatnaşyklary ýola goýmaga ýardam berjek türkmen-mongol işewürler maslahatynyň möhüm ähmiýeti nygtaldy.

Türkmenistanyň Söwda-senagat edarasynyň

Metbugat gullugy.