TSSE Täzelikler

       2026-njy ýylyň 20-nji awgustynda Türkmenistanyň Söwda-senagat edarasynda “Kids EXPO: ähli zat çagalar üçin” atly halkara sergi-ýarmarkasy öz işini dowam edýär.

Çagalar üçin niýetlenen önümleriň we hyzmatlaryň giň toplumyny bir ýere jemleýän sergi ýurdumyzyň hem-de daşary ýurtlaryň kompaniýalary üçin özara tejribe alyşmak, täze hyzmatdaşlyk gatnaşyklaryny ýola goýmak we döwrebap önümleri giň köpçülige tanyşdyrmak babatda ähmiýetli meýdança öwrülýär.

Serginiň pawilýonlarynda çagalaryň gündelik durmuşynda zerur bolan egin-eşikler, oýnawaçlar, okuw we döredijilik serişdeleri, dürli harytlar hem-de hyzmatlar hödürlenýär. Önümleriň görnüşleriniň köpdürlüligi, olaryň döwrebaplygy we hili sergä gelýänleriň ünsüni özüne çekýär.

“Kids EXPO” diňe bir sergi-ýarmarka bolmak bilen çäklenmän, eýsem çagalaryň ösüşi, bilimi, döredijiligi we sagdyn durmuş ýörelgeleri bilen bagly täze başlangyçlary öňe sürmek üçin hem möhüm mümkinçilikler döredilýär.

Halkara sergi-ýarmarkasynyň dowam edýän günlerinde onuň meýdançasy çagalar üçin döredilen täze mümkinçilikleriň, döwrebap önümleriň we işewür hyzmatdaşlygyň özboluşly merkezine öwrülýär. Bu bolsa “Kids EXPO: ähli zat çagalar üçin” sergisiniň çagalaryň bagtyýar geljegine gönükdirilen möhüm başlangyçlaryň biri hökmünde ähmiýetini has-da artdyrýar.

Türkmenistanyň Söwda-senagat edarasynyň

Metbugat gullugy.