TSSE Täzelikler

     Hazaryň türkmen kenaryndaky “Awaza” milli syýahatçylyk zolagy şu günler halkara hyzmatdaşlygyň, netijeli dialogyň we täze başlangyçlaryň özboluşly merkezine öwrülýär. Bu ýerde geçirilýän giň gerimli halkara çäreler Türkmenistanyň parahatçylyk döredijilikli daşary syýasatynyň, sebit we dünýä ýurtlary bilen köpugurly gatnaşyklary yzygiderli ösdürmäge gönükdirilen strategiýasynyň aýdyň beýany bolup durýar.

         Awazada geçirilýän ýokary derejeli duşuşyklar häzirki döwrüň möhüm meselelerini ara alyp maslahatlaşmak bilen bir hatarda, döwletleriň arasynda özara bähbitli hyzmatdaşlygyň täze ugurlaryny kesgitlemäge giň mümkinçilik döredýär. Esasan-da, söwda-ykdysady gatnaşyklary giňeltmek, maýa goýum hyzmatdaşlygyny ösdürmek, ulag-logistika mümkinçiliklerinden netijeli peýdalanmak, energetika we durnukly ösüş boýunça bilelikdäki başlangyçlary ilerletmek meseleleri aýratyn ähmiýete eýe bolýar.

         Bu halkara çäreleriň Türkmenistanyň ykdysady ösüşiniň täze mümkinçiliklerini dünýä jemgyýetçiligine giňden tanyşdyrmak babatda hem ähmiýeti uludyr. Ýurdumyzda döredilen amatly maýa goýum şertleri, döwrebap mümkinçilikleriň kemala gelýändigini görkezýär.

         Awaza bu gün diňe bir Hazaryň kenaryndaky döwrebap syýahatçylyk merkezi däl. Ol dürli döwletleriň we işewür toparlaryň pikir alyşýan, täze hyzmatdaşlyk ugurlaryny ara alyp maslahatlaşýan, özara ynanyşmaga we netijeli hyzmatdaşlyga esaslanýan möhüm halkara meýdançasydyr.

Halkara duşuşyklaryň çäklerinde geçirilýän medeni we ynsanperwer çäreler bolsa döwletleriň we halklaryň arasyndaky dost-doganlyk gatnaşyklarynyň has-da pugtalandyrylmagyna ýardam edýär. Bu bolsa ykdysady hyzmatdaşlygyň berk binýady bolan özara düşünişmegiň we ynanyşmagyň ähmiýetini ýene-de bir gezek açyp görkezýär.

Türkmenistanyň halkara derejesindäki şeýle möhüm çäreleriň geçirilýän merkezi hökmünde Awazany öňe çykarmagy ýurdumyzyň sebit hyzmatdaşlygyny ösdürmekde eýeleýän ornunyň barha pugtalandyrylýandygynyň aýdyň subutnamasydyr.

Şeýlelikde, Hazaryň türkmen kenarynda ýaýbaňlandyrylýan halkara dialog Türkmenistanyň dünýä ykdysady giňişlikdäki işjeň ornuny berkitmek, täze hyzmatdaşlyk mümkinçiliklerini açmak we uzak möhletleýin, özara bähbitli ykdysady gatnaşyklary ösdürmek babatda möhüm ähmiýetli täze sahypany açýar.

Türkmenistanyň Söwda-senagat edarasynyň

Metbugat gullugy.