18.11.2026
2026-njy 24 –
26-njy noýabry aralygynda Aşgabat şäherinde ulag-logistika ulgamynyň we sanly
tehnologiýalaryň ösüşine bagyşlanan iki sany iri halkara çäre – “Halkara
ulag-üstaşyr geçelgeleri: özara arabaglanyşyk we ösüş – 2026” atly halkara
maslahat we sergi, şeýle-de “Türkmentel – 2026” atly halkara sergi we ylmy
maslahat geçiriler. Halkara çäreler Türkmenistanyň Söwda-senagat edarasynyň
binasynda ýaýbaňlandyrylar.
Häzirki döwürde ulag-logistika
ulgamynyň we sanly tehnologiýalaryň dünýä ykdysadyýetindäki ähmiýeti barha
artýar. Şunuň bilen baglylykda, geçiriljek halkara çäreler bu ugurlarda halkara
hyzmatdaşlygy giňeltmek, öňdebaryjy tejribeleri alyşmak hem-de täze işewürlik
gatnaşyklaryny ýola goýmak üçin möhüm meýdança bolar.
“Türkmentel –
2026” halkara sergisinde telekommunikasiýa, maglumat-aragatnaşyk
tehnologiýalary, emeli aň, 5G ulgamy, sanly platformalar, maliýe
tehnologiýalary we maglumat howpsuzlygy boýunça döwrebap çözgütler görkeziler. Ulag
ulgamyna bagyşlanan halkara maslahatyň çäklerinde bolsa halkara ulag geçelgelerini
ösdürmek, üstaşyr gatnawlaryň mümkinçiliklerini giňeltmek we ulag
arabaglanyşygyny berkitmek meselelerine garalar.
Çäreleriň çäklerinde
B2B we B2G görnüşindäki duşuşyklara hem aýratyn ähmiýet berler. Bu duşuşyklar
milli we daşary ýurt kompaniýalarynyň, şeýle-de döwlet edaralarynyň
wekilleriniň arasynda göni işewürlik gatnaşyklaryny ýola goýmaga, täze
hyzmatdaşlygy tapmaga we geljegi uly taslamalary ara alyp maslahatlaşmaga mümkinçilikleri
döreder.
Aşgabatda geçiriljek
bu halkara çäreler Türkmenistanyň ulag-logistika we sanly aragatnaşyk
ulgamlarynyň mümkinçiliklerini halkara derejede tanyşdyrmaga, hyzmatdaşlygyň
täze ugurlaryny kesgitlemäge hem-de ýurdumyzyň halkara ulag-üstaşyr
geçelgeleriniň ösdürilmegindäki ornuny pugtalandyrmaga hyzmat eder.
Türkmenistanyň
Söwda-senagat edarasynyň
Metbugat gullugy.