Täzelikler

  2024-nji ýylyň 1-nji dekabrynda Daşary işler ministri Raşid Meredowyň ýolbaşçylygyndaky Türkmenistanyň wekiliýeti Syçuan welaýatynyň Çendu şäherinde (HHR) geçirilen “Merkezi Aziýa – Hytaý” formatyndaky daşary işler ministrleriniň bäşinji duşuşygyna gatnaşdy.

 Duşuşyga gatnaşyjylar gatnaşyjy ýurtlaryň umumy bähbitleri üçin konstruktiw hyzmatdaşlygy berkitmäge gönükdirilen bilelikdäki tagallalary güýçlendirmek nukdaýnazaryndan “Merkezi Aziýa – Hytaý” formatynda hyzmatdaşlygyň möhüm ornuny bellediler.

 Dar düzümde geçirilen duşuşygyň gün tertibine girizilen meseleleriň çäginde Türkmenistanyň, Gazagystanyň, Gyrgyzystanyň, Täjigistanyň, Özbegistanyň we Hytaýyň daşary syýasat edaralarynyň ýolbaşçylary Merkezi Aziýa ýurtlarynyň we Hytaýyň arasyndaky gatnaşyklaryň ileri tutulýan ugurlaryny ara alyp maslahatlaşdylar we mundan beýläkki hyzmatdaşlygyň wajyp ugurlaryny kesgitlediler.

 Sebit we ählumumy gün tertibiniň birnäçe halkara meseleleri boýunça pikir alyşyldy.

 Diplomatlar munuň bilen birlikde, “Merkezi Aziýa – Hytaý” formatynyň ýakyn wagtda geçiriljek ikinji sammitine taýýarlyk, syýasy gatnaşyklary berkitmek we ösdürmek, işewür hyzmatdaşlygy mundan beýläk-de ösdürmegiň esasy ugurlary, söwda gatnaşyklaryny goramak we giňeltmek, energetika we ulag arabaglanyşygyny üpjün etmek bilen baglanyșykly meseleleri ara alyp maslahatlaşdylar.

 Soňra “Merkezi Aziýa – Hytaý” formatynyň daşary işler ministrleriniň duşuşygy giňeldilen düzümde dowam etdi.

 Ara alnyp maslahatlaşylan meseleleriň hatarynda uzak möhletli parahatçylygy we durnuklylygy üpjün etmek, syýasy, söwda-ykdysady we maýa goýum hyzmatdaşlygyny güýçlendirmek we ynsanperwer gatnaşyklary giňeltmek üçin bilelikdäki tagallalary birleşdirmegiň zerurlygyna aýratyn üns berildi.

 Türkmenistanyň Daşary işler ministriniň belleýşi ýaly, sylaşykly gepleşikleriň medeniýeti ýurtlar bilen halklaryň arasyndaky ynanşmagy we parahatçylygy has-da berkitmek üçin esas döredip, ol wagt bilen çäklendirilip bilinmez.

 Duşuşygyň netijeleri boýunça “Merkezi Aziýa – Hytaý” formatynyň çäginde köptaraplaýyn hyzmatdaşlygyň geljegi uly ugurlaryny kesgitleýän Jemleýji resminama gol çekildi.

mfa.gov