TSSE Täzelikler

   2024-nji ýylyň 19-njy sentýabrynda dabaraly açylyp, 21-nji sentýabra çenli dowam eden Türkmenistanyň Garaşsyzlygynyň 33 ýyllygy mynasybetli ýurdumyzyň ykdysady üstünlikleriniň sergisi ak mermerli paýtagtymyzdaky «Garagum» myhmanhanasynyň ýanyndaky giň meýdançada özboluşly baýramçylyk şowhuny bilen üstünlikli geçirildi.

Ýurdumyzyň garaşsyz ösüşiniň 33 ýyllyk döwründäki ýetilen belent sepgitleriniň gözden geçirilişinde ýokary tehnologiýaly önümçilikler, ýurdumyzyň kärhanalarynda öndürilýän hem-de içerki we daşary ýurt bazarlarynda mynasyp orun eýeleýän döwrebap gurluşyk we bezeg serişdeleri, kompýuter we elektron harytlar, ulag we logistika, bank ulgamynyň hyzmatlary, häzirkizaman aragatnaşyk we kommunikasiýa mümkinçilikleri, halkyň sarp edýän harytlaryny öndürmekde, ekologiýa we daşky gurşawy goramak, saglygy goraýyş, sport we syýahatçylyk ulgamyny, bilimi we ylmy, medeniýeti ösdürmek ugurlarynda gazanylan üstünlikler türkmen we dünýä jemgyýetçiligine giňden ýaýbaňlandyryldy.

Gatnaşyjylar bu serginiň ýokary derejede geçirilmegine giň mümkinçilikler döredip berendigi üçin hormatly Prezidentimiz Arkadagly Gahryman Serdarymyza çäksiz alkyşlar aýtdylar. Serginiň ahyrynda oňa gatnaşyjylara sertifikatlaryň gowşurylyş dabarasy boldy.

Türkmenistanyň Garaşsyzlygynyň 33 ýyllygy mynasybetli Türkmenistanyň ykdysady üstünlikleriniň sergisine gatnaşyjylar tarapyndan Hormatly Prezidentimize Ýüzlenme kabul edildi.

Türkmenistanyň Söwda-senagat edarasynyň

 Metbugat gullugy.