TSSE Täzelikler

 Düýn Türkmenistanyň Söwda-senagat edarasynyň döwrebap binasynda açylan Telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel ─ 2024» atly XVII halkara sergisi we ylmy maslahaty öz işini üstünlikli dowam edýär.

 Üç günläp dowam etmegi göz öňünde tutulan bu giň möçberli halkara çäresiniň çäklerinde geçirilýän ylmy maslahatlarda, duşuşyklarda, şeýle hem okuw sapaklarynda dünýäniň dürli künjeklerinden oňa gatnaşýan hünärmenler türkmen kärdeşleri bilen telekommunikasiýa, innowasiýa we ýokary tehnologiýa pudagynda özara tejribe we pikir alyşýarlar.

 Maglumat we ylmy-tehnologiki taýdan örän uly ähmiýete eýe bolan bu halkara çäresinde oňa ýurdumyzdan we daşary ýurtlardan gatnaşýan alymlara, bilermenlere, işewürlere we halkara guramalaryň wekillerine sanly transformasiýa, kiberhowpsuzlyk, kommunikasiýanyň geljegi, hemra tehnologiýalary ýaly ugurlarda mundan beýläk hem halkara hyzmatdaşlygyny ösdürmek boýunça meseleleri ara alyp maslahatlaşmaga mümkinçilik döredilýär.  

Türkmenistanyň Söwda-senagat edarasynyň

Metbugat gullugy.