TSSE Täzelikler

      2026-njy ýylyň 22-nji oktýabrynda Türkmenistanyň Söwda-senagat edarasynda geçirilýän “Türkmenistanyň nebiti we gazy – 2026” atly halkara maslahat we sergi öz işini dowam etdirýär. Halkara energetika jemgyýetçiliginiň wekillerini, öňdebaryjy kompaniýalary we pudagyň hünärmenlerini bir ýere jemleýän bu forum nebitgaz ulgamynda özara bähbitli hyzmatdaşlygy ösdürmek hem-de täze maýa goýum mümkinçiliklerini ara alyp maslahatlaşmak üçin möhüm meýdança bolup çykyş edýär.

         Halkara serginiň çäklerinde nebitgaz pudagynda ulanylýan döwrebap tehnologiýalar, innowasion önümçilik çözgütleri, uglewodorod serişdelerini gözläp tapmakdan başlap, olary gaýtadan işlemäge çenli bolan ugurlarda öňdebaryjy tejribeler görkezilýär. Şeýle hem önümçiligiň netijeliligini ýokarlandyrmak, energiýa serişdelerini rejeli peýdalanmak we ekologik talaplara laýyk gelýän tehnologiýalary ornaşdyrmak meselelerine aýratyn ähmiýet berilýär.

Çäräniň maksatnamasyna laýyklykda, B2B we B2G görnüşindäki işewür duşuşyklar, Türkmenistanyň degişli döwlet edaralarynyň wekilleri bilen gepleşikler geçirilýär. Olaryň dowamynda işewür gatnaşyklary giňeltmegiň, maýa goýum taslamalaryny ara alyp maslahatlaşmagyň, tehnologik hyzmatdaşlygy ösdürmegiň hem-de bilelikdäki başlangyçlary durmuşa geçirmegiň mümkinçiliklerine garalýar.

Halkara maslahat we sergi Türkmenistanyň ýangyç-energetika toplumynyň mümkinçiliklerini dünýä jemgyýetçiligine giňden tanyşdyrmaga, daşary ýurtly hyzmatdaşlar bilen özara bähbitli gatnaşyklary pugtalandyrmaga we pudagyň ösüşine gönükdirilen täze başlangyçlary öňe sürmäge ýardam berýär.

“Türkmenistanyň nebiti we gazy – 2026” atly halkara maslahaty we sergisi energetika ulgamynda tejribe alyşmak, maýa goýum hyzmatdaşlygyny ösdürmek hem-de uzak möhletleýin işewür gatnaşyklary ýola goýmak üçin möhüm halkara meýdançasydyr.

Türkmenistanyň Söwda-senagat edarasynyň

Metbugat gullugy.