TSSE Täzelikler

2024-nji ýylyň 5-nji noýabrynda Türkmenistanyň Söwda-senagat edarasynyň döwrebap binasynda üç günläp geçirilen «Türkmenistanyň gurluşygy, senagaty, energetikasy ─ 2024» atly halkara sergisi we «Türkmenistanyň gurluşyk, senagat, energetika pudaklarynyň ösüşi» atly maslahaty öz işini üstünlikli jemledi.

Bu sergi we maslahat türkmen hünärmenleri bilen daşary ýurt kompaniýalarynyň wekilleriniň özara tejribe alyşmagynda, geljekde giň gerimli hyzmatdaşlygy ýola goýmakda, iki tarapa hem bähbitli taslamalary ara alyp maslahatlaşmakda uly ähmiýete eýe boldy. Bu özboluşly gözden geçirilişiň dowamynda milli ykdysadyýetimiziň gurluşyk, senagat pudaklaryny döwrebaplaşdyrmak we diwersifikasiýalaşdyrmak babatda alnyp barylýan giň gerimli işler bilen tanyşdyryldy.

Pawilýonlarynda dünýä bazarynda bäsdeşlige ukyply önümleriň dürli görnüşleri görkezilen bu giň möçberli çäräniň ahyrynda oňa işjeň gatnaşanlara ýörite sertifikatlar gowşuryldy. Şeýle hem hormatly Prezidentimize oňa gatnaşyjylaryň adyndan Ýüzlenme kabul edildi.

Türkmenistanyň Söwda-senagat edarasynyň

Metbugat gullugy.