TSSE Täzelikler

2024-nji ýylyň 20-nji noýabrynda Lebap welaýatynyň Türkmenabat şäherindäki «Türkmeniň ak öýi» binalar toplumynda Türkmenistanyň we Özbegistan Respublikasynyň Ikinji sebitara forumynyň çäklerinde geçirilýän Özbegistanda öndürilýän harytlaryň milli sergisiniň açylyş dabarasy boldy.

Serginiň çäklerinde iki ýurduň hususy kompaniýalarynyň wekilleriniň hem-de telekeçileriniň arasynda ikitaraplaýyn duşuşyklaryň, «Söwda ulgamynda hyzmatdaşlygy ösdürmek: amatly şertleri döretmek we telekeçiligi goldamak» şeýle hem «Medeni-ynsanperwer ulgamlarda hyzmatdaşlyk: medeniýet we ynsanperwerlik ugrunda tejribe alyşmak, ylym we bilim ugrunda hyzmatdaşlyk, syýahatçylyk pudagyny ösdürmekdäki mümkinçilikler» atly «tegelek stol»  görnüşli maslahatlaryň geçirilmegi meýilleşdirilýär.

Iki günläp dowam etjek doganlyk döwletiň gazanan üstünlikleriniň sergisiniň ilkinji gününde Lebap welaýatynyň Seýitnazar Seýdi adyndaky döwlet sazly drama teatrynda Türkmenistanyň we Özbegistanyň sungat ussatlarynyň bilelikdäki konsertiniň guralmagy dost-doganlyga gönükdirilen gatnaşyklaryň has-da pugtalanmagyna özboluşly täsir eder.

Türkmenistanyň Söwda-senagat edarasynyň

Metbugat gullugy.