TSSE Täzelikler

2024-nji ýylyň 18-19-njy dekabrynda  hormatly Prezidentimiziň ýolbaşçylygynda hökümet wekiliýetiniň agzalarynyň Malaýziýa resmi iş sapary boldy. Bu resmi iş sapary ikitaraplaýyn türkmen-malaý hyzmatdaşlygyň taryhynda täze sahypany açýan tapgyr bolup, söwda-ykdysady ulgamdaky gatnaşyklaryň oňyn ösüş depgini bilen häsiýetlendirilýär.

       Hormatly Prezidentimiz Serdar Berdimuhamedowyň we Malaýziýanyň Premýer-ministri Anwar Ibrahimiň arasynda iki döwletiň arasyndaky gatnaşyklary mundan beýläk-de pugtalandyrjak syýasy-diplomatik, söwda-ykdysady, medeni-ynsanperwer ulgamlarda hyzmatdaşlygy yzygiderli ösdürjek özara bähbitli birnäçe duşuşyklar geçirildi.

         Geçirilen duşuşyklaryň  dowamynda Türkmenistanyň we Malaýziýanyň arasynda amala aşyrylýan ykdysady ösüş maksatnamalaryny, senagat pudagyndaky özgertmeleri we işewürlik üçin döredilýän amatly şertleri göz öňünde tutmak bilen, hyzmatdaşlygy täze ugurlar boýunça mundan beýläk-de işjeňleşdirmekde Türkmenistanyň we Malaýziýanyň arasynda Bilelikdäki Beýannama gol çekildi. Mundan başga-da taraplar Türkmenistanyň Söwda-senagat edarasy bilen Malaýziýanyň Halkara söwda-senagat edarasynyň arasynda özara düşünişmek hakynda Ähtnamany hem-de Türkmenistanyň Söwda-senagat edarasy bilen Malaýziýanyň Milli söwda-senagat edarasynyň arasynda özara düşünişmek hakynda Ähtnamany alyşdylar.

         Döwlet Baştutanymyzyň Malaýziýa resmi sapary iki ýurduň hem deňhukukly, özara bähbitli, uzak möhletleýin döwletara gatnaşyklary mundan beýläk-de pugtalandyrmagy maksat edinýändigini aýdyň görkezdi.

 Türkmenistanyň Söwda-senagat edarasynyň

Metbugat gullugy.