TSSE Täzelikler

   2025-nji ýylyň 25-nji maýynda “Ak şäherim Aşgabat” atly XXIV köpugurly halkara sergisi öz işini üstünlikli tamamlady. Türkmenistanyň Söwda-senagat edarasynda geçirilen bu halkara sergi şähergurluşyk, binagärlik, ýol-ulag düzümi, ekologiýa, ýaşaýyş-durmuş hyzmatlary ýaly dürli ugurlary öz içine alyp, giň möçberli innowasion çözgütleriň we taslamalaryň tanyşdyrylmagyna mümkinçilik berdi.

         Sergä ýurdumyzdaky döwlet edaralary, senagat we gurluşyk kompaniýalary, hususy pudagyň wekilleri bilen bir hatarda daşary ýurtlardan gatnaşan kompaniýalar hem ýokary tehnologiýalara esaslanýan önümlerini we hyzmatlaryny görkezdiler. Şeýle hem serginiň çäklerinde ýurdumyzyň dürli sebitleriniň şäher gurluşygynda gazanan üstünlikleri we milli binagärlik aýratynlyklary giňden wagyz edildi.

         Çärä gatnaşan daşary ýurtly myhmanlar we diplomatlar Aşgabadyň häzirki zaman ösüşi, şäher meýilnamalaşdyrylyşy, ýaşamak üçin döredilen amatly şertler bilen ýakyndan tanyşdylar. Şeýle-de  gatnaşyjylaryň arasynda hyzmatdaşlyk gatnaşyklarynyň ösdürilmegine gönükdirilen birnäçe ikitaraplaýyn duşuşyklar hem geçirildi.

         Serginiň ahyrynda gatnaşyjylara diplomlar gowşuryldy. Dabaraly pursatyň yzysüre  sergä gatnaşyjylar tarapyndan çuňňur hormatyň hem hoşallygyň nyşany hökmünde Hormatly Prezidentimiziň adyna Ýüzlenme kabul edildi. Bu sergi paýtagtymyzyň halkara abraýynyň yzygiderli artýandygynyň we ösüş ýolunda gazanýan üstünlikleriniň nobatdaky beýanyna öwrüldi.

Türkmenistanyň Söwda-senagat edarasynyň

Metbugat gullugy.