TSSE Täzelikler

       2026-njy ýylyň 14-nji aprelinde Türkmenistanyň Söwda-senagat edarasynyň mejlisler zalynda geçirilen “Turkmentravel – 2026” halkara maslahaty ýurdumyzyň syýahatçylyk kuwwatyny dünýä tanyşdyrmakda möhüm ädim boldy. Dünýäniň dürli künjeklerinden gelen bilermenleri we halkara guramalaryň wekillerini bir ýere jemlän bu forum, Türkmenistanyň sebitde iri syýahatçylyk merkezine öwrülýändiginiň aýdyň subutnamasyna öwrüldi.

        Maslahatyň dowamynda halkara derejeli wekilleriň çykyşlaryna uly orun berildi. BMG-niň Bütindünýä Syýahatçylyk Guramasynyň Ýewropa sebiti departamentiniň direktory Kordula Wohlmuther we Türkiýe Respublikasynyň Medeniýet we syýahatçylyk ministriniň orunbasary Nadir Alpaslan ýaly myhmanlar Türkmenistan bilen hyzmatdaşlygyň täze ugurlaryny beýan etdiler.

     Gyrgyzystan, Azerbaýjan, Uganda we Wýetnam ýaly ýurtlaryň wekilleri özara tejribe alyşmak we syýahatçylyk akymlaryny artdyrmak boýunça möhüm teklipleri öňe sürdiler.

        Forumyň iň gyzykly bölümleriniň biri syýahatçylyk pudagyna sanly tehnologiýalary ornaşdyrmak we maýa goýumlaryny çekmek meselesine bagyşlandy. “Neksta” we “Taryhy Syýahat” ýaly kärhanalaryň mysalynda syýahatçylyk hyzmatlarynyň döwrebaplaşdyrylyşy; “Lavka”, “Tör” ýaly gastronomik taslamalaryň we “ProSinergiýa consulting” kärhanasynyň strategiýalary; CAREC maksatnamasynyň çäginde howa gatnawlarynyň elýeterliligini ýokarlandyrmak meseleleri ara alnyp maslahatlaşyldy.

     Türkmenistanyň taryhy we medeni ýadygärliklerini goramak baradaky milli müdirliginiň hem-de Medeniýet institutynyň hünärmenleri ýurdumyzyň maddy däl mirasynyň dünýä syýahatçylary üçin esasy özüne çekiji güýçdigini nygtadylar.

    “Turkmentravel – 2026” halkara maslahaty Türkmenistanyň öz gadymy mirasy bilen döwrebap dünýäniň arasynda berk köpri gurýandygyny görkezdi. Dünýäniň dürli künjeklerinden gelen bilermenleriň teklipleri we döwrebap innowasiýalar ýurdumyzyň syýahatçylyk pudagynyň täze reňkler bilen baýlaşmagyna hyzmat eder. Indi dünýä syýahatçylary üçin Türkmenistan diňe bir Beýik Ýüpek ýolunyň ýüregi däl, eýsem iň häzirki zaman hyzmatlarynyň we myhmansöýerligiň täze duralgasydyr.

Türkmenistanyň Söwda-senagat edarasynyň

Metbugat gullugy.