TSSE Täzelikler

         2025-nji ýylyň 23-nji sentýabrynda Türkmenistanyň Söwda-senagat edarasynyň ýolbaşçysy bilen Hytaý Halk Respublikasynyň Türkmenistandaky Adatdan daşary we Doly ygtyýarly ilçisi jenap Szi Şumin bilen duşuşyk geçirildi.

         Duşuşygyň dowamynda taraplar iki ýurduň arasyndaky söwda-ykdysady hyzmatdaşlygynyň häzirki ýagdaýy hem-de geljekki ösüş ugurlary barada giňişleýin pikir alyşdylar. Hususan-da, Türkmenistanyň we Hytaýyň arasynda eksport-import gatnaşyklarynyň giňeldilmegi, haryt dolanyşygynyň ýokarlandyrylmagy hem-de täze maýa goýum taslamalarynyň durmuşa geçirilmegi bilen baglanyşykly meseleler ara alnyp maslahatlaşyldy.

         Jenap Szi Şumin Hytaý bilen Türkmenistanyň arasynda uzakmöhletleýin we özara bähbitli hyzmatdaşlygyň ösdürilmeginiň ähmiýetini nygtap, Hytaý kompaniýalarynyň türkmen bazarynda has işjeň gatnaşmaga gyzyklanma bildirýändigini belledi.

         Türkmenistanyň Söwda-senagat edarasynyň ýolbaşçysy Hytaý bilen ykdysady gatnaşyklary giňeltmekde uly mümkinçilikleriň bardygyny aýdyp, döwlet derejesindäki goldawlaryň netijesinde täze taslamalaryň durmuşa geçiriljegine ynam bildirdi.

         Duşuşyk dostlukly hem-de işjeň ýagdaýda geçdi.

Türkmenistanyň Söwda-senagat edarasynyň

Metbugat gullugy.