TSSE Täzelikler

         2025-nji ýylyň 20-nji noýabrynda Eýran Yslam Respublikasynyň Gülüstan welaýatynyň eksport mümkinçilikleriniň ýöriteleşdirilen   göçme sergisi öz işine başlady.

     Sergi Balkan welaýatynyň Balkanabat şäheriniň köpugurly söwda bazarynda gurnaldy. Çäräniň  açylyş dabarasynda Türkmenistanyň Söwda-senagat edarasynyň başlygy, Eýran Yslam Respublikasynyň Gülüstan welaýatynyň häkimi we Balkan welaýatynyň häkiminiň orunbasary gatnaşyjylary  tüýs ýürekden gutlap, onuň işine uly üstünlikleri arzuw etdiler. Dabara aýdym-sazly çäre bilen utgaşdy.

     Serginiň maksady  Gülüstan welaýatynyň eksport mümkinçiliklerini görkezmek we  iki goňşy döwletiň arasynda syýasy-ykdysady gatnaşyklaryny has-da pugtalandyrmakdan ybarat boldy.

      Çäräniň guramaçysy Türkmenistanyň Söwda-senagat edarasy we Balkan welaýat häkimligi bolup çykyş edýär.

     Sergä  Gülüstan welaýatynyň öňdebaryjy önümçilik işewürleri gatnaşýar.  Bu sergi Eýran Yslam Respublikasynyň Gülüstan welaýatynyň eksport mümkinçiliklerini görkezmegiň oňat mümkinçiligi bolup, goňşy ýurduň ykdysadyýetiniň möhüm ugurlaryny giňden beýan edýär.

       Serginiň işiniň üç gününiň dowamynda eksport mümkinçilikleriniň  gözden geçirilişine gelýän köp sanly adamlar onuň bilen giňişleýin tanyşmaga, özara bähbitler esasynda geljekki meýilnamalary hem-de işewürlik başlangyçlaryny kesgitlemäge mümkinçilik alarlar.

                                                        Türkmenistanyň Söwda-senagat edarasynyň

                                                                                                    Metbugat gullugy