TSSE Täzelikler

       2025-nji ýylyň 21-nji awgustynda Türkmenistanyň Söwda-senagat edarasynda dowam edýän “Kids Expo: ähli zat çagalar üçin” atly halkara sergi-ýarmarkasynyň çäginde täze rekordlar hasaba alyndy. Sergi-ýarmarkanyň meýdançasynda geçirilen Halkara akyl arifmetika olimpiadasynyň jemleýji tapgyrynda ýurdumyzyň ýaş zehinleri  dünýä jemgyýetçiligini haýran galdyrdy.

         Halkara Memoriad – Bütindünýä zehin sportlary Federasiýasynyň Prezidenti Melik Duýar tarapyndan resmi taýdan tassyklandy: Ýatdan hasaplamak bäsleşikleriniň çäklerinde ýurdumyzyň zehinli okuwçylary mental arifmetikanyň 3 görnüşi boýunça dünýä rekorduny goýdular.

Çalt Flaş Anzan. Balkanabat şäherindäki iňlis dili, fizika we matematika derslerini çuňlaşdyryp öwredilýän ýöriteleşdirilen 22-nji orta mekdebiniň okuwçysy, “Kämil bilim” okuw merkeziniň diňleýjisi Aly Oraşow 0,3 sekunt tizlik bilen çalşyp duran 150 sany 2 belgili sanlary goşmak boýunça öz ukyby görkezdi. Yzygiderli 5 gezek dogry netije görkezen Aly dünýä rekorduny goýmagy başardy.

Iň çalt ýatdan goşmak. Türkmenabat şäherindäki 38-nji orta mekdebiň okuwçysy, Rowaç Begenjow 100 sany 1 belgili sanlary dogry goşup, yzygiderli 3 gezek dogry netije görkezdi. Şeýlelikde, Rowaç dünýä rekorduny goýmagyň hötdesinden geldi. Ýatdan hasaplamak bäsleşikleriniň çäklerinde ýurdumyzyň zehinli okuwçylary mental arifmetikanyň 3 görnüşi boýunça dünýä rekorduny goýdular.

Iň çalt ýatdan köpeltmek. Balkanabat şäherindäki daşary ýurt dillerine ýöriteleşdirilen 3-nji orta mekdebiň okuwçysy, “Kämil bilim” okuw merkeziniň diňleýjisi Mekan Batyrow 8 belgili sanlary 8 belgili sanlara 10 gezek ýatdan çalt we dogry köpeltmek boýunça dünýä rekorduny goýdy.

           Halkara akyl arifmetika olimpiadasy dünýäniň dürli ýurtlaryndan ýygnanan çagalaryň zehin başarnyklaryny synagdan geçirýän uly bäsleşik hökmünde tanalýar. Ýaryş diňe bir çalt hasaplamak başarnygyna däl, eýsem ünsüňi jemlemek, pikir ýöretmek hem-de psihologiki durnuklylyk ýaly möhüm ukyplary ösdürmäge gönükdirilýär.

         Türkmenistanly okuwçylaryň dünýä rekordy diňe bir olaryň şahsy üstünligi bolman, eýsem Gahryman Arkadagymyz hem Hormatly Prezidentimiz tarapyndan ýurdumyzyň ýaşlaryna döredilen mümkinçilikleriň, bilim ulgamynda alnyp barylýan özgertmeleriň miwesidir. Şeýle üstünlikleriň Türkmenistanyň halkara abraýyny belende galdyryp, ýaşlaryň zehin mümkinçiliklerini dünýäde wagyz etmekde mynasyp paýy bar.

         Ýaş zehinlerimiziň üstünlikli çykyşynyň netijesinde ýurdumyz dünýäniň intellektual ýaryşynda täze rekordlar bilen adygdy. Bu bolsa ýaşlaryň döredijilik ukyplarynyň giňdigini, ýurdumyzyň bilim ulgamynyň ösüşiniň ýokary derejededigini subut edýär.

Türkmenistanyň Söwda-senagat edarasynyň

Metbugat gullugy.