TSSE Täzelikler

        2025-nji ýylyň 18-19-njy sentýabry aralygynda Aşgabat şäherinde ýurdumyzyň ykdysadyýetiniň ösüş mümkinçiliklerini giňden görkezmek maksady bilen Türkmenistanyň Maýa goýum forumy we sergisi geçiriler.

         Forum dünýäniň dürli ýurtlaryndan maýadarlary, halkara maliýe guramalarynyň wekillerini hem-de türkmen bazaryna girmegi maksat edinýän öňdebaryjy kompaniýalary birleşdirýän möhüm işewür platforma bolup çykyş eder. Ol gatnaşyjylar üçin hyzmatdaşlyk mümkinçiliklerini ara alyp maslahatlaşmaga, täze maýa goýum taslamalaryny durmuşa geçirmek boýunça pikir alyşmaga giň mümkinçilik döreder.

         Şeýle hem forumyň çäklerinde geçiriljek sergi milli ykdysadyýetiň esasy ugurlary bolan senagat, oba hojalygy, energetika, gurluşyk, ulag we aragatnaşyk pudaklarynda gazanylan häzirki zaman ösüşleri görkezjek interaktiw meýdança öwrüler. Sergi gatnaşyjylara ýurdumyzyň ykdysady kuwwaty, önümçilik mümkinçilikleri hem-de hyzmatdaşlyk üçin döredilen şertler bilen tanyşmaga mümkinçilik berer.

    Türkmenistanyň Maýa goýum forumy we sergisi halkara hyzmatdaşlygynyň giňelmegine, ykdysady gatnaşyklaryň pugtalandyrylmagyna hem-de ýurdumyzyň maýa goýum ýagdaýynyň mundan beýläk-de ösdürilmegine hyzmat etmegi maksat edinýär.

Türkmenistanyň Söwda-senagat edarasynyň

Metbugat gullugy.