TSSE Täzelikler

Türkmenistan bilen Malaýziýanyň arasyndaky söwda-ykdysady hyzmatdaşlygy has-da ösdürmek we täze hyzmatdaşlyk mümkinçiliklerini açmak maksady bilen, 2025-nji ýylyň 4-6-njy fewraly aralygynda Türkmenistanyň Söwda-senagat edarasynyň, Türkmenistanyň Senagatçylar we telekeçiler birleşmesiniň wekillerinden ybarat wekiliýet Malaýziýanyň paýtagty Kuala-Lumpur şäherine iş saparyny amala aşyrdy.

Bu saparyň esasy maksady – iki ýurduň telekeçilik we senagat pudaklarynda hyzmatdaşlygyny pugtalandyrmak, maýa goýum mümkinçiliklerini öwrenmek we ikitaraplaýyn söwda dolanşygynyň möçberini artdyrmakdan ybaratdyr.

Malaýziýanyň Halkara Söwda-senagat edarasynyň binasynda Türkmenistanyň wekiliýetiniň Malaýziýanyň Halkara Söwda-senagat edarasynyň we Malaýziýanyň Halal Ösüş Korporasiýasynyň wekilleri bilen duşuşygy geçirildi.

         Duşuşygyň dowamynda, ikitaraplaýyn söwda-ykdysady hyzmatdaşlygy, syýahatçylygy ösdürmek bilen bilelikde 2025-nji ýylyň 23-24-nji aprelinde Kuala-Lumpur şäherinde geçirilmegi meýilleşdirilýän “Türkmenistanyň ykdysadyýetine daşary ýurt maýa goýumlaryny çekmek boýunça halkara forumyna” taýýarlyk işleri hem ara alnyp maslahatlaşyldy we halkara forumyň ýokary derejede guralmagy üçin möhüm ädimler ädildi. http://www.teif-turkmenistan.com/

         Mälim bolşy ýaly, 2024-nji ýylyň dekabr aýynda Türkmenistanyň Prezidenti Serdar Berdimuhamedowyň Malaýziýa resmi saparynyň dowamynda, iki ýurduň arasyndaky söwda-ykdysady hyzmatdaşlygy ösdürmek maksady bilen birnäçe resminamalara gol çekildi. Bu resminamalar Türkmenistanyň we Malaýziýanyň arasyndaky hyzmatdaşlygyň täze gözýetimlerini açyp, iki ýurduň arasyndaky söwda-ykdysady gatnaşyklarynyň mundan beýläk-de ösdürilmegine itergi berer.

Türkmenistanyň Söwda-senagat edarasynyň

Metbugat gullugy.