TSSE Täzelikler

      2025-nji ýylyň 4-nji awgustynda BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäklerindäki ugurdaş çäreleriň, işewir duşuşyklaryň hatarynda Türkmenistanyň Söwda-senagat edarasynyň ýolbaşçysy bilen Taýland Patyşalygynyň Türkmenistandaky Adatdan daşary we doly ygtyýarly ilçisiniň arasynda duşuşyk geçirildi. Duşuşyk iki ýurduň  söwda-ykdysady gatnaşyklary pugtalandyrmak, täze hyzmatdaşlyk mümkinçiliklerini ara alyp maslahatlaşmak we öňdebaryjy tejribeleri paýlaşmak maksady bilen guraldy.

         Duşuşygyň esasy maksady, Türkmenistan bilen Taýlandyň arasyndaky söwda, ulag we ykdysady hyzmatdaşlygy ösdürmekden  ybarat boldy.

           Duşuşykda ulag ulgamynyň ösdürilmegi we multimodal ulag arabaglanyşygynyň giňeldilmegi bilem bagly meselelere aýratyn üns berildi. Häzirki wagtda “Awaza” milli syýahatçylyk zolagy, ýurduň eksport-import söwdasyny has hem ýokarlandyrmak we Taýland bilen söwda gatnaşyklaryny ösdürmek üçin möhüm strategiki we geografik orny eýeleýär.

    Duşuşygyň ahyrynda, syýahatçylyk, söwda we ykdysady hyzmatdaşlygy has-da berkitmek boýunça täze hyzmatdaşlyk mümkinçilikleriniň açylmagyna ýol açyljakdygy nygtaldy.

         Bu duşuşyk Türkmenistan bilen Taýlandyň arasyndaky ykdysady gatnaşyklary güýçlendirmek we giňeltmek üçin möhüm ädim bolup, iki ýurduň hyzmatdaşlygyny täze derejä çykarmakda uly ähmiýete eýedir. 

Türkmenistanyň Söwda-senagat edarasynyň

Metbugat gullugy.