TSSE Täzelikler

         Hormatly Prezidentimiziň öňdengörüjilikli daşary syýasaty netijesinde Türkmenistan bilen Kuweýt Döwletiniň arasyndaky dostlukly gatnaşyklar yzygiderli ösdürilýär. 2025-nji ýylyň 23-nji sentýabrynda Amerikanyň Birleşen Ştatlaryna amala aşyrylan iş saparynyň dowamynda Hormatly Prezidentimiziň Kuweýt Döwletiniň Mirasdüşer Şazadasy Şeýh Sabah Al-Halid Al-Sabah bilen duşuşygy iki ýurduň hyzmatdaşlygyny täze mazmun bilen baýlaşdyrdy. Ýokary derejede geçirilen gepleşiklerde söwda-ykdysady gatnaşyklary giňeltmek, maýa goýum hyzmatdaşlygyny işjeňleşdirmek hem-de ileri tutulýan ugurlarda gatnaşyklary ösdürmek boýunça geljegi uly başlangyçlar öňe sürülip, iki taraplaýyn hyzmatdaşlygyň mümkinçilikleri açyldy.

         Şol ýokary derejeli duşuşygyň amaly dowamyny üpjün etmek maksady bilen, 2026-njy ýylyň 16-njy fewralynda El-Kuweýt şäherinde türkmen-kuweýt işewürler duşuşygy geçirildi. Türkmenistanyň Söwda-senagat edarasynyň wekilleriniň gatnaşmagynda geçirilen çäre iki ýurduň işewür toparlarynyň arasynda göni gatnaşyklary ýola goýmak we täze hyzmatdaşlyk mümkinçiliklerini açmak babatda möhüm ähmiýete eýe boldy.

          Söwda dolanşygyny artdyrmak, maýa goýum hyzmatdaşlygyny giňeltmek, energetika, senagat, gurluşyk we ulag-logistika ulgamlarynda bilelikdäki taslamalary durmuşa geçirmek meseleleri giňişleýin ara alnyp maslahatlaşyldy. Şeýle-de häzirki zaman tehnologiýalaryny ornaşdyrmak, önümçilik kuwwatlaryny ýokarlandyrmak hem-de eksport mümkinçiliklerini giňeltmek boýunça teklipler öňe sürüldi.

         El-Kuweýt şäherinde geçirilen bu duşuşyk döwlet derejesinde gazanylan ylalaşyklaryň işewürlik derejesinde üstünlikli dowam etdirilýändigini görkezýär. Türkmen-kuweýt hyzmatdaşlygynyň pugtalandyrylmagy iki ýurduň ykdysady ösüşine we özara bähbitli gatnaşyklarynyň täze derejä çykarylmagyna giň ýol açýar.

Türkmenistanyň Söwda-senagat edarasynyň

Metbugat gullugy.