TSSE Täzelikler

       2026-njy ýylyň 16-njy ýanwarynda Türkmenistanyň Söwda-senagat edarasynda Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani bilen Türkmenistanyň Söwda-senagat edarasynyň başlygynyň arasynda duşuşyk geçirildi.

         Duşuşygyň dowamynda Eýran Yslam Respublikasynyň gatnaşmagynda şu ýylyň dowamynda geçirilmegi meýilleşdirilýän EYR-nyň “Iran Prože” atly ýöriteleşdirilen sergisini guramak, onuň geçiriljek senelerini kesgitlemek, şeýle-de türkmen-eýran Işewürler maslahatyny geçirmek bilen bagly meseleler giňden ara alnyp maslahatlaşyldy. Taraplar serginiň ýokary derejede guralmagy üçin degişli taýýarlyk işleriniň geçirilmeginiň möhümdigini bellediler.

         Şeýle-de duşuşykda iki ýurduň işewür toparlarynyň arasynda göni gatnaşyklary pugtalandyrmak, täze hyzmatdaşlyk ugurlaryny açmak hem-de özara söwda-ykdysady gatnaşyklary ösdürmek boýunça pikir alyşmalar boldy. Senagat, gurluşyk, energetika, ulag-logistika we beýleki möhüm pudaklarda hyzmatdaşlygyň mümkinçiliklerine aýratyn üns berildi.

         Türkmenistanyň Söwda-senagat edarasynyň başlygy Eýran Yslam Respublikasy bilen hyzmatdaşlygyň yzygiderli ösdürilýändigini nygtap, bilelikdäki sergileriň we işewürlik maslahatlarynyň bu gatnaşyklaryň mundan beýläk-de giňeldilmeginde möhüm orun eýeleýändigini aýtdy.

         Eýran Yslam Respublikasynyň ilçisi Ali Mojtaba Ruzbehani öz gezeginde Türkmenistanyň işewür toparlaryny Eýran Yslam Respublikasynda geçiriljek beýleki halkara we ýöriteleşdirilen sergilere gatnaşmaga çagyrdy. Şeýle hem ol “Iran Prože” sergisiniň iki ýurduň telekeçileriniň arasynda tejribe alyşmak, täze taslamalary ara alyp maslahatlaşmak hem-de uzak möhletleýin hyzmatdaşlygy ýola goýmak üçin netijeli meýdança boljakdygyna ynam bildirdi. Serginiň geçiriljek seneleriniň taraplaryň özara ylalaşygy esasynda kesgitlenjekdigini belledi.

         Duşuşyk özara düşünişmek hyzmatdaşlygy mundan beýläk-de ösdürmäge taýýarlyk ruhunda geçdi.

Türkmenistanyň Söwda-senagat edarasynyň

Metbugat gullugy