TSSE Täzelikler

     2025-nji ýylyň 3-nji noýabrynda  «Awaza» milli syýahatçylyk zolagynda «Türkmenistanyň gurluşyk, senagat, himiýa, energetika pudaklarynyň ösüşi» atly halkara sergi we maslahat öz işine başlady. Dabaranyň başynda Hormatly Prezidentimiziň  halkara sergä we maslahata gatnaşyjylara iberen Gutlagy okaldy.

      Hormatly Prezidentimiziň belleýşi ýaly,  Garaşsyz Türkmenistanyň hemişelik Bitaraplygynyň 30 ýyllyk baýramynyň öňüsyrasynda guralýan halkara sergi we maslahat ýurdumyzyň senagat kuwwatyny artdyrmak, gurluşyk, senagat toplumynyň pudaklaryny, milli ykdysadyýetimizi diwersifikasiýa ýoly bilen ösdürmek, dünýä bazarlarynda uly islegden peýdalanýan harytlaryň täze önümçiligini döretmek we bar bolanlarynyň kuwwatyny artdyrmak boýunça ileri tutulýan maksatnamalary amala aşyrmakda uly ähmiýete eýedir.

     Milli ykdysadyýetimiziň ähli ulgamlary bilen bir hatarda, gurluşyk we senagat pudagy hem ýokary depginlerde ösýär. Çäräniň maksady - Türkmenistanyň ykdysadyýetiniň esasy pudaklaryna daşary ýurt maýa goýumlaryny çekmekden, şeýle hem halkara we sebitleýin hyzmatdaşlygyny ösdürmekden ybaratdyr.

     Halkara sergide milli ykdysadyýetimiziň gurluşyk, senagat pudaklaryny döwrebaplaşdyrmak we diwersifikasiýalaşdyrmak babatda alnyp barylýan giň gerimli işler bilen tanyşdyrylýar. Şeýle hem sergi meýdançasynda ýurdumyzyň elektroenergetika, awtomobil ýollarynyň gurluşygy, himiýa senagaty pudaklarynda gazanan üstünlikleri  hem öz beýanyny tapýar.

   Gurluşyk, senagat, himiýa, energetika pudagyny öz içine alýan halkara sergi hem maslahat ýokary derejede tejribe alyşmaga we netijeli duşuşyklary geçirmäge mümkinçilik berýär.

                                                          Türkmenistanyň Söwda-senagat edarasynyň

                                                                                                    Metbugat gullugy