TSSE Täzelikler

       Milli Liderimiz Watanymyzyň geljegi bolan ýaş nesle aýratyn hormat, söýgi bilen garaýar. Olaryň geljeginiň ajaýyp günlere beslenmegi ugrunda döwletli işleri amala aşyrýar. Gahryman Arkadagymyzyň beýik başlangyçlaryndan ugur alnyp, ýaş nesliň aladasy bu günki günde hormatly Prezidentimiziň dowam etdirmeginde döwlet syýasatynyň ileri tutulýan ugurlarynyň biridir.

      Watanymyzyň geljegi bolan çagalara bagyşlanyp, 2025-nji ýylyň 21-23-nji awgusty aralygynda Türkmenistanyň Söwda-senagat edarasynda “Kids Expo: ähli zat çagalar üçin” halkara sergi-ýarmarkasy geçiriler. Bu halkara çäresi çagalaryň durmuşynyň dürli ugurlaryny öz içine alýan önümleri, hyzmatlary we innowasion çözgütleri görkezmäge gönükdirilendir.

         Sergi-ýarmarka dürli ýaşdaky çagalara degişli tematiki ugurlarda geçirilip, onuň dowamynda  bäbekler üçin niýetlenen önümlerden başlap, mekdep esbaplaryna, bilim-tejribe serişdelerine çenli giň toplumda harytlar görkeziler. Serginiň esasy ugurlary şulardan ybarat bolar:

·        Bäbekler üçin önümler;

·        Mekdep harytlary;

·        Çagalar üçin bilim we terbiýe;

·        Oýunjaklar we ösüş ýardamçylary;

·        Çagalaryň durmuşynda tans,saz we sungat;

·        Çagalaryň saglygy we howpsuzlygy;

·        Çagalaryň bilim ulgamyndaky innowasion tehnologiýalar;

·        Çagalar üçin edebiýat we kitap okamak

Bu sergi, içerki we daşary ýurtly öndürijiler, bilim guramalary, neşirýatlar hem-de beýleki degişli pudaklaryň wekilleri üçin öz önümlerini we hyzmatlaryny giň jemgyýetçilige tanatmakda uly mümkinçilik döreder. Şeýle hem ene-atalar we pedagoglar üçin çagalaryň ösüşine goldaw berýän täze önümler bilen tanyşmak, hyzmatdaşlyk gurmak üçin bu çäre möhüm ähmiýete eýe bolar.

“Kids Expo: ähli zat çagalar üçin” halkara sergi-ýarmarkasy çagalaryň sagdyn ösmegine, döredijilik mümkinçilikleriniň  we bilim derejesiniň ýokarlandyrylmagyna gönükdirilen başlangyçlary öňe sürýän giň gerimli çäre hökmünde  seslenme gazanmagyna garaşylýar.

Türkmenistanyň Söwda-senagat edarasynyň

Metbugat gullugy.