TSSE Täzelikler

       Gazagystanyň paýtagty Astana şäheri şu günlerde sebit we dünýä derejesinde ekologiýa we durnukly ösüş meseleleriniň çözgütleri ara alnyp maslahatlaşylýan möhüm halkara merkeze öwrüldi. 2026-njy ýylyň 22-23-nji apreli aralygynda BMG-niň goldamagynda geçirilýän “Durnukly geljek boýunça umumy garaýyş” atly Sebitleýin ekologiýa sammiti hem-de 22-24-nji apreli aralygynda dowam edýän “RES 2026 EXPO” atly Ýaşyl tehnologiýalaryň we durnukly çözgütleriniň Halkara sergisi Merkezi Aziýada “ýaşyl” ösüşiň täze ugurlaryny kesgitleýär.

         Türkmenistanyň hormatly Prezidenti Serdar Berdimuhamedowyň ýolbaşçylygyndaky hökümet wekiliýetiniň bu ýokary derejeli çärelerde gatnaşmagy ýurdumyzyň halkara başlangyçlarynyň ähmiýetini nobatdaky gezek tassyklady. Sammitiň dowamynda kabul ediljek Bilelikdäki Jarnama sebit ýurtlarynyň ekologiýa howpsuzlygyny üpjün etmek, howa üýtgemelerine garşy göreşmek we tebigy serişdeleri netijeli peýdalanmak boýunça bilelikdäki hereketleriniň möhüm binýadyna öwrüler.

         “RES 2026 EXPO” halkara sergisi bolsa ýaşyl tehnologiýalaryň, innowasion çözgütleriň we ykdysady hyzmatdaşlygyň özboluşly görkezilişine öwrüldi. Serginiň çäklerinde Türkmenistanyň Milli pawilýony aýratyn gyzyklanma döredýär. Bu ýerde milli miras bilen döwrebap ösüşiň sazlaşygy üstünlikli görkezilýär.

          Hususan-da, Gahryman Arkadagymyzyň “Türkmenistanyň dermanlyk ösümlikleri” atly köp jiltli ylmy eserleriň tanyşdyrylyşy ýurdumyzyň tebigy baýlyklarynyň ylmy taýdan öwrenilişini we saglygy goraýyş ulgamyndaky mümkinçiliklerini açyp görkezýär. Şeýle hem milli el halylary, dokma önümleri we beýleki eksport ugurly harytlar Türkmenistanyň ykdysady kuwwatyny beýan edýär.

         Sanly tehnologiýalaryň ulanylmagy arkaly Türkmenistanyň tebigy gözellikleriniň we “Ýaşyl” ösüş konsepsiýasynyň görkezilmegi pawilýony serginiň iň köp gelinýän ýerleriniň birine öwürdi.

         Astana şäherinde geçirilýän bu giň gerimli çäreler Türkmenistanyň ekologiýa diplomatiýasyndaky işjeň ornuny, durnukly ösüşe gönükdirilen strategiýasynyň üstünliklerini hem-de halkara derejesinde ykrar edilýändigini aýdyň görkezýär. Bu bolsa Merkezi Aziýada hyzmatdaşlygyň täze mümkinçiliklerini açyp, umumy “ýaşyl” geljege tarap ynamly ädimleri üpjün edýär.  

Türkmenistanyň Söwda-senagat edarasynyň

Metbugat gullugy.