TSSE Täzelikler

         “Ak şäherim Aşgabat” atly XXIV köpugurly halkara serginiň çäklerinde 24-nji maýda Türkmenistanyň Söwda-senagat edarasynyň binasynda möhüm işewürlik duşuşyklary geçirildi.

         Duşuşyklar Türkmenistanyň Söwda-senagat edarasynyň agzalarynyň gatnaşmagynda hem-de Belarus Respublikasynyň Söwda-senagat edarasynyň Minsk şäher bölüminiň ýolbaşçylygyndaky işewürler wekiliýeti bilen bilelikde guramaçylykly ýagdaýda amala aşyryldy.

Şol gün Türkmenistanyň Söwda-senagat edarasynyň agzalarynyň we belarus wekiliýetiniň arasynda 13 sany ikitaraplaýyn duşuşyklar guraldy. Duşuşyklarda taraplar dürli pudaklarda, şol sanda senagat, energetika, oba hojalygy, gurluşyk, ulag-logistika we beýleki ugurlarda hyzmatdaşlygyň mümkinçiliklerini ara alyp maslahatlaşdylar.

Gepleşikleriň dowamynda taraplar özara bähbitli hyzmatdaşlygy ösdürmek boýunça anyk teklipler bilen çykyş edip, geljekde bilelikdäki taslamalary durmuşa geçirmek mümkinçiliklerine seretdiler.

Bu duşuşyklar iki ýurduň işewür toparlarynyň arasynda özara düşünişmegi hem-de ykdysady gatnaşyklary has-da pugtalandyrmaga ýardam bermek bilen bir hatarda, Türkmenistanyň daşary ykdysady strategiýasynyň üstünlikli durmuşa geçirilýändigini hem görkezýär.

Türkmenistanyň Söwda-senagat edarasynyň

Metbugat gullugy.