TSSE Täzelikler

       2025-nji ýylyň 24-nji maýynda «Ak şäherim Aşgabat» atly XXIV köpugurly halkara sergi bilen utgaşyklylykda  halkara maslahat hem  geçirildi. Maslahatda şähergurluşyk we binagärlik boýunça öňdebaryjy tejribeleri paýlaşmak, paýtagtymyzyň ösüş derejesini giňden görkezmek maksat edinildi.

Paýtagtymyzyň ajaýyp “Olimpiýa” myhmanhanasynda  badalga alan maslahata Türkmenistanyň hökümet ýolbaşçylary, ministrlikleriň we pudaklaýyn dolandyryş edaralarynyň wekilleri, ýurdumyzyň ýokary okuw mekdepleriniň professor-mugallymlary, talyp ýaşlar bilen bir hatarda daşary ýurtlardan gelen myhmanlar, halkara guramalaryň wekilleri, dürli döwletleriň Türkmenistandaky ilçileri hem gatnaşdylar. Şeýle giň halkara düzümli maslahat paýtagtymyzyň abraýynyň halkara derejesindäki ornunyň barha artýandygynyň aýdyň subutnamasyna öwrüldi.

         Maslahatda çykyş edenler hormatly Prezidentimiziň şäher gurluşygy baradaky öňdengörüjilikli syýasatynyň netijesinde Aşgabat şäheriniň häzirki zaman talaplaryna laýyklykda depginli ösýändigini, onuň diňe bir ýurdumyzyň däl, eýsem, tutuş sebitiň iň owadan, ýaşamak üçin amatly şäherleriniň birine öwrülendigini aýratyn nygtadylar.

Halkara serginiň hem maslahatyň çäklerinde birnäçe işewürlik duşuşyklary geçirilip, özara bähbitli hyzmatdaşlygy giňeltmek ara alnyp maslahatlaşyldy.

Türkmenistanyň Söwda-senagat edarasynyň

Metbugat gullugy.