TSSE Täzelikler

      2025-nji ýylyň 24-nji maýynda Türkmenistanyň Söwda-senagat edarasynda “Ak şäherim Aşgabat” atly XXIV köpugurly halkara sergisi öz işine başlady. Bu sergi ýurdumyzyň paýtagtynyň – häzirki döwürde Aziýanyň merjeni hökmünde ykrar edilen ak mermerli Aşgabadyň – häzirki zaman şähergurluşyk, senagat, ykdysady we medeniýet ugurlarynda gazanan üstünliklerini giňden açyp görkezýär.

         Dünýäniň iň owadan hem-de ýaşamak üçin amatly şäherleriniň birine öwrülen Aşgabatda adamlaryň ýaşaýyş-durmuşy üçin ähli şertleriň döredilmegi Türkmenistanyň döwlet syýasatynyň ileri tutulýan ugrudyr. Bu başlangyç Türkmenistanyň at gazanan arhitektory, Gahryman Arkadagymyz Gurbanguly Berdimuhamedowyň ylmy esaslara daýanýan başlangyçlarynyň netijesinde durmuşa geçirilip, häzirki wagtda hormatly Prezidentimiz Serdar Berdimuhamedow tarapyndan üstünlikli dowam etdirilýär.

      Sergide medeni-durmuş maksatly desgalaryň gurluşygy, döwrebap şäher meýilnamasy, innowasion “akylly” şäher tehnologiýalarynyň ulanylmagy hem-de tebigata dostlukly, gaýtadan dikeldilýän energiýa çeşmelerine möhüm orun berilýändigi aýratyn bellenilýär. Bu ugurda gurulýan täze Arkadag şäheri Türkmenistanyň häzirki zaman şäher gurluşygyna täze ruhy we tehnologiki mazmun getirýär.

        “Ak şäherim Aşgabat” sergisi diňe bir şäheriň ösüşini görkezmek bilen çäklenmän, eýsem, halkara hyzmatdaşlygy ösdürmegiň hem-de ýurdumyzyň geljegine bolan ynamyň nyşany hökmünde ähmiýetlidir.

         Sergi 2025-nji ýylyň 25-nji maýyna çenli dowam eder.

Türkmenistanyň Söwda-senagat edarasynyň

Metbugat gullugy.