TSSE Täzelikler

2024-nji ýylyň 19-njy iýulynda Türkmenistanyň Söwda-senagat edarasynyň başlygynyň Birleşen Arap Emirlikleriniň ýurdumyzdaky Adatdan daşary we Doly ygtyýarly ilçisi Ahmed Al Hameli bilen duşuşygy boldy. Ol şu ýylyň 25-nji iýunynda Aşgabat şäherinde geçirilen «Türkmenistan — Birleşen Arap Emirlikleri» işewürlik maslahatynyň jemlerine bagyşlandy.

Duşuşykda iki dostlukly ýurduň döwlet we işewür düzümleriniň ýolbaşçylarynyň hem-de öňdebaryjy kompaniýalarynyň hünärmenleriniň gatnaşan işewürlik maslahatynyň ýokary guramaçylyk we netijeli häsiýete eýe bolandygy bellenildi. Bu forumda Emirlikleriň energetika, sanly tehnologiýalar, söwda, oba hojalygy, azyk senagaty, gurluşyk we syýahatçylyk ugurlaryna ýöriteleşen öňdebaryjy kompaniýalarynyň geljegi uly türkmen bazaryndaky ornuny pugtalandyrmagy hem-de giňeltmegi maksat edinýändikleri tassyklanyldy.

Taraplaryň nygtaýşy ýaly, açyklyk we ynanyşak ýagdaýynda geçirilen işewürlik maslahatynda ykdysadyýetiň we maýa goýumlaryň dürli ugurlaryndaky, ösen tehnologiýalar pudagyndaky gatnaşyklary täze derejä çykarmagyň ýollary, söwda dolanyşygyny giňeltmegiň mümkinçilikleri seljerildi hem-de bilelikdäki işiň anyk meýilnamalary kesgitlenildi. Forumyň çäklerinde iki ýurduň telekeçileriniň arasynda tejribe alyşmak hem-de ýakyn gatnaşyklary mundan beýläk-de işjeňleşdirmek maksady bilen duşuşyklar guraldy.

Duşuşyga gatnaşyjylar iki ýurduň arasynda işewürlik hyzmatdaşlygyny giňeltmäge täze itergi berýän şunuň ýaly çäreleri geljekde hem guramak üçin Türkmenistanyň Söwda-senagat edarasy bilen BAE-niň Söwda-senagat edaralarynyň federasiýasynyň arasynda özara gepleşikleri dowam etmegiň möhümdigini bellediler.

Türkmenistanyň Söwda-senagat edarasynyň

Metbugat gullugy.