TSSE Täzelikler

 2024-nji ýylyň 10-njy sentýabrynda paýtagtymyzdaky «Ýyldyz» myhmanhanasynda  Türkmenistanyň maýa goýum forumy we ugurdaş sergisi  açyldy. Iki günläp dowam etjek bu giň möçberli çäre daşary ýurt maýa goýumlaryny çekmekde, dünýä maýadarlaryny türkmen döwletiniň ykdysady kuwwaty hem-de Garaşsyzlyk ýyllarynda gazanan üstünliklerimiz bilen tanyşdyrmakda uly ähmiýete eýe bolar.  

Daşary ýurt maýadarlarynyň, işewürleriniň, halkara maliýe-bank düzümleriniň hem-de Türkmenistanyň döwlet edaralarynyň, ýurdumyzyň telekeçileriniň arasynda netijeli gatnaşyklaryň çäklerini giňeltmekden ugur alnyp geçirilýän bu forumyň we ugurdaş serginiň çäklerinde durmuşyň ähli ulgamlarynda durnukly ösüş hem-de täze tehnologiýalaryň peýdalanylmagy, Türkmenistanyň maýa goýum mümkinçilikleri, sanly infrastruktura hem-de sanly innowasiýon tehnologiýalar bilen baglanyşykly meselelerde özara tejribe alyşmaga mümkinçilik dörediler.

Bu möhüm ähmiýetli çäräniň dowamynda oňa gatnaşýan myhmanlar häzirki döwürde Türkmenistanyň ösüşiniň umumy ykdysady görkezijileri, onuň maýa goýum strategiýasy, ýurdumyzyň senagat-innowasiýon ösüşi, önümçilik ulgamyna ylmy-tehniki işläp taýýarlamalaryň we iň täze tehnologiýalaryň ornaşdyrylmagy, şeýle hem sanly ykdysadyýete geçilmegine gönükdirilen özgertmeler bilen ýakyndan tanşarlar.

Türkmenistanyň Söwda-senagat edarasynyň

Metbugat gullugy.