TSSE Täzelikler

2024-nji ýylyň 19-njy awgustynda Aşgabat şäheriniň «Garagum» myhmanhanasynyň arkasynda döredilen sergi meýdançasynda açylan «Kids Expo: ähli zat çagalar üçin» atly halkara sergi-ýarmarkasy çagalar we ulular üçin dürli medeni hem-de güýmenje çärelerini guramak arkaly öz işini dowam edýär.

Sergi diňe bir çagalar üçin harytlary, hyzmatlary görkezmek bilen çäklenmän, eýsem, ýaş nesli terbiýelemek, bilim bermek ulgamynda dünýäniň öňdebaryjy tejribeleri bilen tanyşmak üçin hem amatly meýdançadyr. Çagalar bu ýerde guralýan dürli gyzykly çärelere gatnaşmak arkaly wagtlaryny hoş geçirýärler. Ýöriteleşdirilen sergi-ýarmarkasynyň ikinji gününde hem çagalar üçin dürli mowzuklarda tälim beriji ussatlyk sapaklary, çaga lybaslarynyň görkezilişi, ertekileriň, multfilmleriň gahrymanlarynyň, hokgabazlaryň şowhunly çykyşlary, gyzykly güýmenje oýunlary guralýar.

Ulular, şol sanda ene-atalar çagalar harytlary we hyzmatlar senagatyna ýöriteleşen kompaniýalaryň hünärmenlerinden çaga terbiýelemek bilen bagly maslahatlary alyp bilerler. Bu ýerde ýaňy doglan bäbeklerden başlap, uly ýaşly mekdep okuwçylaryna çenli zerur bolan harytlaryň baý görnüşi sergä gelýänlere hödürlenilýär.

Çagalar we ulular üçin gyzykly hem-de peýdaly çäreler bilen utgaşýan sergi-ýarmarka 22-nji awgusta çenli öz işini dowam eder.

Türkmenistanyň Söwda-senagat edarasynyň

Metbugat gullugy.