TSSE Täzelikler

      2026-njy ýylyň 5-nji noýabrynda Türkmenistanyň Söwda-senagat edarasynda üç günläp dowam eden “Türkmenistanyň gurluşyk, senagat, himiýa, energetika pudaklarynyň ösüşi” atly halkara sergi we maslahat öz işini üstünlikli jemledi.

         Halkara forumyň jemleýji güni sanly gurluşyk we “akylly" şäherleri ösdürmekde öňdebaryjy tehnologiýalary ornaşdyrmak, innowasion çözgütleri giňden ulanmak, şeýle hem geljekki hünärmenleriň hünär başarnyklaryny kämilleşdirmek bilen bagly möhüm meseleler ýörite mejlisiň dowamynda giňişleýin ara alnyp maslahatlaşyldy.

         Üç günüň dowamynda geçirilen halkara sergi we maslahat ýurdumyzyň gurluşyk, senagat, himiýa hem-de energetika pudaklarynyň ösüş mümkinçiliklerini halkara jemgyýetçiligine giňden tanyşdyrmakda, daşary ýurtly hyzmatdaşlar bilen özara bähbitli gatnaşyklary pugtalandyrmakda we täze hyzmatdaşlyk ugurlaryny kesgitlemekde möhüm meýdança boldy.

         Çäräniň jemleýji gününde halkara sergä gatnaşyjylary sylaglamak dabarasy geçirildi. Şeýle hem halkara sergi we maslahata gatnaşyjylaryň Hormatly Prezidentimiziň adyna Ýüzlenmesi kabul edildi.

         Halkara sergi we maslahat ýurdumyzyň ykdysady ösüşiniň ileri tutulýan ugurlaryny dünýä jemgyýetçiligine giňden tanyşdyrmakda, halkara hyzmatdaşlygyny giňeltmekde hem-de täze işewür başlangyçlara ýol açmakda möhüm ähmiýete eýe boldy.

Türkmenistanyň Söwda-senagat edarasynyň

Metbugat gullugy.