TSSE Täzelikler

       2026-njy ýylyň 7-nji iýulynda  Duşenbe şäherinde Türkmen-täjik işewürler geňeşiniň ikinji mejlisi ýokary derejede geçirildi.

      Bu iri göwrümli foruma Türkmenistanyň Söwda-senagat edarasynyň başlygy M. Gurdowyň hem-de Täjigistanyň Söwda-senagat edarasynyň başlygy F. Rahmonaliniň ýolbaşçylygyndaky wekiller, şeýle hem iki döwletiň degişli ministrlikleriniň, pudaklaýyn edaralarynyň ýolbaşçy düzümleri we Türkmenistanyň Senagatçylar we telekeçiler birleşmesiniň agzalary gatnaşdylar.

     Maslahatyň dowamynda taraplar özara ykdysady gatnaşyklaryň häzirki ýagdaýyny, aýratyn-da söwda-ykdysady hyzmatdaşlygy diwersifikasiýalaşdyrmak, eksport-import amallarynyň göwrümini artdyrmak hem-de täze bilelikdäki maýa goýum taslamalaryny durmuşa geçirmek meselelerini düýpli ara alyp maslahatlaşdylar.

      Mejlisde täjik tarapy türkmen telekeçileri we maýadarlary üçin ýurduň strategiki taýdan möhüm bolan Erkin ykdysady zonalarynda  döredilen amatly şertleri giňişleýin tanyşdyrdy.

     Öz gezeginde, Türkmenistanyň wekilleri ýurdumyzyň ykdysady kuwwatyny, şeýle hem sebitde halkara derejeli döwrebap ulag-logistika we üstaşyr tranzit geçelgeleriniň mümkinçiliklerini görkezýän çykyşlarynyň üsti bilen bu ugurlaryň täjik harytlarynyň dünýä bazarlaryna çykmagynda ygtybarly köpri bolup hyzmat etjekdigini nygtadylar.

     Foruma gatnaşan iki ýurduň  hususy kompaniýalarynyň, önüm öndürijileriniň we işewürleriniň arasynda geçirilen göni B2B gepleşikleriniň netijesinde, taraplar geljegi uly täze şertnamalarynyň ugurlaryny kesgitlediler.

    Geçirilen bu işewürler geňeşi diňe bir ykdysady bähbitleri artdyrmak bilen çäklenmän, eýsem sebitde durnukly ösüşi üpjün etmekde we türkmen-täjik dostlukly gatnaşyklaryny täze, hil taýdan has ýokary basgançaga çykarmakda taryhy möhüm ädim boldy.

                                                       Türkmenistanyň Söwda-senagat edarasynyň

                                                                                                  Metbugat gullugy.