TSSE Täzelikler

2026-njy ýylyň 3-nji noýabrynda Türkmenistanyň Söwda-senagat edarasynda “Türkmenistanyň gurluşyk, senagat, himiýa, energetika pudaklarynyň ösüşi” atly Halkara serginiň we maslahatynyň – CIET 2026-nyň açylyş dabarasy boldy. Ýurdumyzda ykdysadyýetiň ileri tutulýan ugurlaryny ösdürmäge, önümçilik kuwwatyny artdyrmaga, döwrebap tehnologiýalary ornaşdyrmaga hem-de halkara ykdysady hyzmatdaşlygy giňeltmäge gönükdirilen bu halkara çäre möhüm ähmiýete eýe boldy.

Açylyş dabarasynda Türkmenistanyň Prezidenti Serdar Berdimuhamedowyň halkara sergä we maslahata gatnaşyjylara iberen Gutlagy okaldy. Döwlet Baştutanynyň Gutlagynda ýurdumyzyň gurluşyk we senagat pudaklarynda gazanylýan üstünlikleri, milli ykdysadyýetiň esasy ugurlarynyň önümçilik kuwwatyny pugtalandyrmak, döwrebap tehnologiýalary ornaşdyrmak hem-de eksport mümkinçiliklerini giňeltmek boýunça alnyp barylýan işler giň beýanyny tapýar.

Dabara Türkmenistanyň hökümet agzalary, daşary ýurtlaryň Türkmenistandaky diplomatik wekilhanalarynyň hem-de halkara guramalaryň ýolbaşçylarydyr wekilleri, jemgyýetçilik guramalarynyň, habar beriş serişdeleriniň ýolbaşçylary we wekilleri gatnaşdylar.

Halkara maslahatynyň wekilleriniň düzüminde dürli döwletleriň döwlet edaralarynyň ýolbaşçylary, halkara maliýe düzümleriniň, iri daşary ýurt kompaniýalarynyň, energetika we öňdebaryjy tehnologiýalar ulgamynyň wekilleri bar. Olaryň gatnaşmagy dürli ýurtlaryň işewür toparlarynyň arasynda tejribe alyşmaga, özara bähbitli gatnaşyklary ösdürmäge hem-de täze hyzmatdaşlyk ugurlaryny kesgitlemäge giň mümkinçilikleri açýar.

Halkara serginiň we maslahatyň çäklerinde gurluşyk, senagat, himiýa we energetika pudaklarynyň häzirki ösüş ugurlary, innowasion tehnologiýalary önümçilige ornaşdyrmak, täze maýa goýum taslamalary hem-de özara bähbitli hyzmatdaşlygyň geljegi ara alnyp maslahatlaşylýar. Şeýle-de çäräniň maksatnamasyna laýyklykda, B2B we B2G görnüşli işewürlik duşuşyklary geçirilýär. Bu duşuşyklar döwlet düzümleri bilen daşary ýurtly işewür toparlaryň arasynda göni gatnaşyklary ýola goýmaga, täze hyzmatdaşlyk başlangyçlaryny öňe sürmäge we maýa goýum mümkinçiliklerini öwrenmäge ýardam berýär.

         “CIET 2026” halkara sergisi we maslahaty Türkmenistanyň ykdysady ösüşiniň täze mümkinçiliklerini açyp görkezmek bilen, ýurdumyzyň halkara işewürlik giňişligindäki ornuny pugtalandyrmaga, daşary ýurtly hyzmatdaşlar bilen netijeli gatnaşyklary ösdürmäge hem-de geljegi uly taslamalary durmuşa geçirmäge gönükdirilendir.

         Halkara sergi we maslahat 5-nji noýabra çenli dowam eder.

Türkmenistanyň Söwda-senagat edarasynyň

Metbugat gullugy.