TSSE Täzelikler

2023-nji ýylyň 20-24-nji noýabry aralygynda Azerbaýjanyň Baku şäherinde BMG-niň Merkezi Aziýa ýurtlarynyň ykdysadyýetleri üçin ýörite Maksatnamasynyň (SPECA) günleriniň çäginde ─ 21-22-nji noýabrda Baku şäherinde «SPECA sebitini ählumumy aragatnaşygyň merkezine öwürmek» atly ykdysady forum hem-de «SPECA ýurtlarynyň sergisi: Durnukly ösüş üçin sebitleýin hyzmatdaşlyk» atly sergi geçirildi.

Baku sergi merkeziniň dört müň inedördül metr meýdanyny öz içine alýan sergide SPECA ýurtlarynyň diwarlyklarynyň we olaryň milli önümleriniň hatarynda Türkmenistanyň Söwda-senagat edarasynyň hem-de Senagatçylar we telekeçiler birleşmesiniň wekilleri tarapyndan taýýarlanylan diwarlyklar we milli önümler görkezildi.

Türkmen diwarlygynda milli el işleri, gurluşyk serişdeleri, dürli görnüşli dokma önümleri, ýurdumyzyň ýangyç-energetika kuwwaty hem-de Arkadag şäheriniň aýratynlyklary bilen tanyşdyrýan fotosuratlardyr wideo görnüşler ýerleşdirildi.

Azerbaýjanyň ýörite başlangyjy bilen SPECA-nyň döredilmeginiň 25 ýyllygy mynasybetli guralan serginiň dowamynda Azerbaýjanyň Prezidentiniň Türkmenistanyň diwarlygy bilen tanyşmagy hem-de onuň türkmen milli gölli halylarynyň, dokma önümleriniň, şeýle-de hususy telekeçiler tarapyndan öndürilýän önümleriň hiline we görnüşlerine ýokary baha bermegi aýratyn bellenilmäge mynasypdyr.

Türkmenistanyň Söwda-senagat edarasynyň

Metbugat gullugy.