TSSE Täzelikler

Türkmenistanyň Söwda senagat edarasynyň sergiler merkezinde üç günläp dowam eden Azyk önümçiliginiň döwrebap tehnologiýalarynyň halkara sergisi öz işini tamamlady.

Ýurdumyzyň döwlet we hususy düzümleriniň, Russiýadan, Türkiýeden, Belarusdan, Özbegistandan gatnaşyjylaryň 100-den gowragy oba hojalyk pudagynda, azyk senagatynda alyp barýan iş ugurlary, innowasiýalary bilen sergä gelýänleri giňden tanyşdyrdylar.

Ýurdumyzda öndürilýän oba hojalyk we azyk önümleriniň esasy bölegi hususyýetçilere degişlidir. Şundan ugur alyp, daýhan hojalyklarynyň ösdürip ýetişdirýän ekologiýa taýdan arassa önümleriniň, hususy azyk önümçilik kärhanalarynyň öndürýän harytlarynyň dürli görnüşlerine sergi meýdançasynda giň orun berildi.

Serginiň çäklerinde kompaniýalaryň täze önümleri, oba hojalygynda we azyk önümçiliginde ulanylýan döwrebap tehnologiýalar bilen tanyşdyrýan mahabat-tanyşdyrylyş çäreleri geçirildi. Ýurdumyzyň döwlet we hususy düzümleriniň wekilleri daşary ýurtly hyzmatdaşlar bilen birnäçe işewürlik duşuşyklaryny geçirdiler.

Halkara serginiň jemleýji gününde oňa gatnaşanlara diplomlar gowşuryldy. Şeýle hem sergä gatnaşyjylar hormatly Prezidentimiz Serdar Berdimuhamedowyň adyna Ýüzlenme kabul etdiler.  

Türkmenistanyň Söwda-senagat edarasynyň

Metbugat gullugy.