TSSE Täzelikler

Söwda-senagat edarasynda azyk önümçiliginiň döwrebap tehnologiýalarynyň halkara sergisi öz işini dowam edýär. Gözden geçirilişiň ikinji gününde oba hojalyk we azyk önümçiligine  ýöriteleşen ýurdumyzyň hem-de daşary döwletleriň wekilleri özleriniň hödürleýän harytlarydyr hyzmatlary bilen sergä gelenleri tanyşdyrýarlar.

Serginiň çäklerinde geçirilýän mahabat-tanyşdyryş çäreleri kompaniýalaryň oba hojalyk önümleriniň önümçiliginde ulanýan tehnologiýalary, täzeçil usullary, öndürýän täze önümleri bilen tanyşmak üçin oňaýly mümkinçilikleri döredýär. Oba hojalygyndaky we azyk önümçiligindäki täze öňegidişliklere bagyşlanan şu gezekki gözden geçiriliş degişli ugurda ýurdumyzyň we daşary ýurtlaryň işewürleriniň arasynda özara bähbitli hyzmatdaşlygy ýola goýmak, tejribeleri alyşmak üçin amatly meýdança bolup hyzmat edýär. Serginiň çäklerinde gyzyklanma bildirýän taraplar hyzmatdaşlyk üçin özara işewürlik duşuşyklaryny geçirýärler.

Ýurdumyzyň we daşary döwletleriň 100-den gowrak wekiliniň gatnaşýan sergisinde ýaýbaňlandyrylan diwarlyklarda ekerançylyk, maldarçylyk, bagçylyk, üzümçilik, bakjaçylyk ýaly oba hojalygynyň dürli ugurlary, taýýar oba hojalyk önümlerini senagat taýdan işlemek, gaplamak we taýýar harytlar bilen ilaty üpjün etmek boýunça  ýöritileşen kärhanalaryň alyp barýan işleri bilen tanyşdyrylýar.

Türkmenistanyň Söwda-senagat edarasynyň

Metbugat gullugy.