Makalalar

BMG-niň Awaza maslahatynyň çäklerinde köpugurly halkara sergi guraldy.

Birleşen Milletler Guramasynyň iri düzümleriniň we beýleki halkara guramalaryň, şeýle hem deňze çykalgasy bolmadyk ösüp barýan döwletleriň käbirleriniň pawilýonlaryny özünde jemlän sergi forumyň esasy platformalarynyň biri boldy. Ol ýurtlaryň ykdysady kuwwatyny görkezmek bilen birlikde, dürli medeniýetleriň, sungatyň, döredijiligiň, halkara inženerçilik çözgütleriniň hem giň sahnasyna öwrüldi.

Köpugurly sergide ýaýbaňlandyrylan pawilýonlaryň umumy sany 25-e barabardyr. Munuň özi 2025-nji ýylymyzyň bütin dünýäde «Halkara parahatçylyk we ynanyşmak ýyly» diýlip yglan edilmegi bilen özboluşly sazlaşygy emele getirdi. Şunda pawilýonlaryň 4-si Türkmenistan döwletimize degişli bolup, birinjisi ýurdumyzyň Garaşsyzlygyna we Garaşsyzlyk ýyllarynda gazanylan üstünliklere, ikinjisi bolsa hemişelik Bitaraplygymyzyň şanly 30 ýyllygyna bagyşlandy. Üçünji milli pawilýonymyzda Durnukly ösüş maksatlarynda Türkmenistanyň orny we ýurdumyzyň gazanan halkara üstünlikleri giňden şöhlelendirildi. BMG-niň Deňze çykalgasy bolmadyk ösüp barýan döwletler boýunça üçünji maslahaty we bu babatda ýurdumyzyň alyp barýan işleri bolsa dördünji milli pawilýonymyzyň mazmunyny düzdi. Pawilýonlara wekilçilik edýän ýaşlar hem Türkmenistanyň Daşary işler ministrliginiň Halkara gatnaşyklary institutynyň hem-de Halkara ynsanperwer ylymlary we ösüş uniwersitetiniň talyplarydyr.

Forumyň bütin dowamynda sanly ulgamyň, döwrebap tehnologiýalaryň mümkinçilikleri giňden ulanylyp, ýokary tizlikli internet we aragatnaşyk hyzmatlary elýeterli boldy. Aýratyn üns bermeli zat bolsa, milli pawilýonlarymyzda degişli QR kodlar ýerleşdirilip, onuň kömegi bilen şol pawilýonyň tematiki ugry boýunça ýurdumyzyň halkara üstünliklerini wideoşekiller arkaly görmek bolýar.

Serginiň çäklerinde daşary ýurtly myhmanlaryň ençemesi bilen söhbetdeş bolduk. Şunda BMG-niň Senagat taýdan ösüş guramasynyň (UNIDO) Merkezi Aziýa we Ýewropa býurosynyň wekili Anastasia Efimowa: «Türkmenistan Durnukly ösüş maksatlaryna ýetmek boýunça möhüm başlangyçlary öňe sürýär. Munuň özi tutuş adamzadyň abadançylygynyň bähbidine hemişelik Bitaraplygynyň ýörelgelerinden hem-de parahatçylyk döredijilik mümkinçiliklerinden netijeli peýdalanmagy maksat edinýän türkmen tarapynyň köpugurly işiniň ähmiýetini görkezýär. Biz muňa şu serginiň dowamynda ýene bir gezek göz ýetirdik» diýip belledi.

Atamyrat Ýazweliýew

Türkmenistanyň Daşary işler ministrliginiň Halkara gatnaşyklary institutynyň talyby

 Çeşme:   «Nesil» gazeti. 2025-nji ýylyň 9-njy awgusty