Makalalar

Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň çäginde guralan köpugurly sergi 2025-nji ýyly – Halkara parahatçylyk we ynanyşmak ýylyny dabaralandyrýan 25 pawilýondan ybarat. Olaryň arasynda BMG-niň degişli düzümleriniň, maslahata gatnaşyjy käbir goňşy we hyzmatdaş döwletleriň hem-de ýurdumyzyň pawilýonlary bar. Sergä gatnaşyjy wekilleri bilen söhbedimiz ösüşiň täze gözýetimlerini açmakda sergileriň orny, milli aýratynlyklar we forumyň taryhy ähmiýeti barada boldy.

Wiktor JEMBA,

BMG-niň Senagat taýdan ösüş guramasynyň (UNIDO) Afrika boýunça wekili:

— Biziň guramamyz BMG-niň çäklerinde 1966-njy ýylda esaslandyryldy. Maksadymyz ösüp barýan döwletlerde senagatyň ilerlemegine ýardam bermek. Bu babatda guramamyz özüniň 60 ýyla golaý taryhynda uly işleri alyp bardy.

Merkezi Aziýa döwletleri, şol sanda, Türkmenistan ençeme ýyldan bäri biziň iň ygtybarly we ýakyn hyzmatdaşlyk alyp barýan agzalarymyzyň biri. Biziň wekillerimiz ýygy-ýygydan Türkmenistanda saparda bolup, ýurduň senagat taýdan ösüşiniň janly şaýady bolýarlar. Men türkmen döwletiniň okgunly ösüşiniň guramamyza agza ýurtlaryň köpüsi üçin nusgalykdygyny aýratyn aýdyp bilerin.

Biz BMG-niň Deňze çykalgasy bolmadyk ösüp barýan döwletler üçin üçünji maslahatynyň çäklerinde öz sergi bölümimizi guradyk. Bölümde myhmanlarymyza UNIDO-nyň alyp barýan işleri barada doly maglumat berýäris. Maslahatyň dowamynda, hut, biziň guramamyz tarapyndan geçirilýän duşuşyklardyr forumlar hem bar.  Çünki senagat taýdan galkynyş şu maslahata gatnaşyjy döwletler üçin ösüşiň esasy ugurlarynyň biridir. Bu babatdaky täze garaýyşlaryňdyr çözgütleriň Awaza forumynyň netijelerinde mynasyp orun aljakdygyna berk ynanýaryn.

Rustam ABDULLAÝEW,

Täjigistanyň Energetika we suw gorlary ministrliginiň wekili:

— Şeýle abraýly maslahata Täjigistanyň wekilçilikli düzüminiň hatarynda gatnaşmak we öz sergi pawilýonymyzy gurap, gymmatlyklarymyzy görkezmek biziň üçin belent mertebe. Munuň üçin türkmen tarapyna tüýs ýürekden hoşallyk bildirýäris. Görşüňiz ýaly, sergi bölümimizde ýurdumyzyň energetika we suw gorlary barada  maglumat berilýär. Suw gorlaryndan aýawly peýdalanmak, «ýaşyl» energetika syýasaty Türkmenistanyň hem, Täjigistanyň hem BMG-niň Baş Assambleýasynyň mejlislerinde orta atýan tekliplerinde möhüm orun eýeleýär. Biziň döwletlerimiz bu meseleler boýunça bilelikdäki taslamalary hem alyp barýarlar. Birleşen tagallalarymyzyň nurana geljek üçin miwelerini eçiljekdigine tüýs ýürekden ynanýaryn.

Awazada bolýan günlerimizde bu ýerde halkara sergini guramak barada gelnen kararyň tüýs ýerine düşen çözgütdigine anyk göz ýetirdik. Sergi deňze çykalgasy bolmadyk ösüp barýan döwletler, ilkinji nobatda bolsa sebitiň döwletleri barada giňişleýin maglumat almaga, birek-biregi ýakyndan tanamaga mümkinçilik berýär.

Pursatdan peýdalanyp, abraýly maslahatyň işine üstünlik arzuw edýäris. Goý, bu maslahatda kabul edilen çözgütler halklaryň we ýurtlaryň bagtyýar geljegine hyzmat etsin!

Asel SUWANKULOWA,

Gazagystanyň «Kazakhinvest» milli kompaniýasynyň wekili:

— Halkara sergiler diňe bir döwletleriň, halklaryň aýratynlyklaryny däl, eýsem, adamlaryň ýüregini hem açyp görkezýär. Sergide 25 pawilýon bolup, olaryň her biri özboluşly häsiýete eýe. Gazagystanyň sergi bölüminde halkymyza mahsus aýratynlyklar bilen bir hatarda döwletimiziň ykdysady galkynyşyny beýan edýän gymmatlyklar ýerleşdirilen. Bu sergi maslahata gatnaşyjy döwletleriň wekilleri üçin geljekki ykdysady gatnaşyklaryň ýygjamlaşmagyna hem oňaýly täsirini ýetirer.

Ýeri gelende aýtsak, Gazagystan BMG-niň Türkmenistanda geçirilýän iri maslahatyna uly ähmiýet berýär. Biz Türkmenistan bilen umumy serhedi bolan, bir deňziň kenarynda ýerleşýän  goňşular. Şonuň üçin maslahatda kabul ediljek çözgütler iki döwlet üçin hem juda möhüm. Däp bolan Merkezi Aziýa döwletleriniň Baştutanlarynyň arasyndaky duşuşyklar bolsa bilelikdäki ösüşiň täze ugurlaryny kesgitleýär. Uly ähmiýete eýe bolan maslahatyň çäginde hem biziň sebitimize degişli ýokary derejeli duşuşyklara aýratyn orun berildi.

Goý, parahatçylygyň, hyzmatdaşlygyň ak ýolunda halklarymyza hemişe ösüş, öňegidişlik ýar bolsun!

Aýkumuş SARKOBENOWA,

Gyrgyz Respublikasynyň Ykdysadyýet we täjirçilik ministrliginiň «Kyrgyz eksport» merkeziniň hünärmeni:

— Biz hem BMG-niň Deňze çykalgasy bolmadyk döwletler boýunça üçünji maslahatynyň çäklerinde ýaýbaňlandyrylan sergä öz bölümimiz bilen gatnaşýarys. Gyrgyzystan baý taryhy we medeni mirasy, ajaýyp tebigaty bolan, okgunly ösýän döwlet. Merkezi Aziýanyň hyzmatdaşlyk arkaly galkynyşyna uly goşant goşýan Gyrgyzystan özüniň ösüşinde sanly ulgamyň mümkinçiliklerine we halkara hyzmatdaşlygyndaky täze ugurlara aýratyn ähmiýet berýär. Biz şol ösüşi sergi bölümimizde hem şöhlelendirmäge çalyşdyk.

Bölüme gelip gören myhmanlar tebigy bala, milli süýjülik önümlerimize, el işlerine we ýurdumyzda öndürilýän noutbuklardyr wirtual äýneklere aýratyn gyzyklanma bildirýärler. Mundan başga-da, wideogörnüşler arkaly ýurdumyz barada giňişleýin maglumat berýäris. Kambaratin Döwlet elektrik stansiýasynyň, sanly ulag mümkinçilikleriniň we gyrgyz tebigatynyň dag gözellikleriniň adamlaryň ünsüni özüne çekýändigini aýtmak isleýäris. Biz maslahata gatnaşyjy döwletler bilen syýahatçylyk we ykdysady ugurlar boýunça bilelikdäki ösüşimizi üpjün edip bileris. Gyrgyzystan ösüşiň ähli ugurlary boýunça dünýä döwletleri bilen ysnyşykly hyzmatdaşlyga taýýar.

Iri maslahat bilen ugurdaşlykda Merkezi Aziýa döwletleriniň we Azerbaýjanyň milli günleriniň meýilleşdirilmegi, onda aýdym-sazly dabaralaryňdyr milli tagamlaryň görkezilişiniň guralmagy möhüm ähmiýete eýe bolup, dost-doganlyk köprülerini has-da berkidýär.

Çeşme: “Türkmenistan” gazeti  

2025-nji ýylyň 7-nji awgusty