Makalalar

Edil birinji we ikinji günlerinde bolşy ýaly, jemleýji gününde-de «Kids EXPO: ähli zat çagalar üçin» atly halkara sergi-ýarmarka köpöwüşginlilik, şadyýanlyk, şowhunly aýdym-sazlaryň hem-de dürli görnüşli bäsleşikleriň geçirilmeginiň döreden ruhubelentligi mahsus boldy. Üç günläp dowam eden sergi-ýarmarkada myhmanlar dürli pawilýonlar bilen içgin tanyşdylar we häzirki zaman ylmynyň gazananlary barada özlerini gyzyklandyrýan sowallara jogap tapdylar. Ýurdumyzda indi ikinji gezek geçirilen sergi-ýarmarkanyň adynda «ähli zat çagalar üçin» diýen sözleriň bolmagy-da eziz Diýarymyzda ösüp gelýän ýaş nesiller barada uly aladalaryň edilýändiginiň aýdyň güwäsidir. Sergi-ýarmarkanyň çäklerinde ýaşajyk ildeşlerimiz tarapyndan mental arifmetika boýunça dünýä rekordlarynyň täzelenmegi bu forumyň ähmiýetini has-da artdyrdy.

23-nji awgustda, «Kids EXPO: ähli zat çagalar üçin» atly halkara sergi-ýarmarkanyň jemleýji gününde geçirilen ýapylyş dabarasy hem uly ruhubelentlige beslendi. Onuň dowamynda «Işjeň sergi pawilýony» atly SMS ses berlişiginde ýeňiji bolanlar sylaglanyldy. 1-nji orna «Balam» oýnawaçlar dünýäsi, 2-nji orna «Nestle» kompaniýasy, 3-nji orna bolsa «Täze aý» haryt nyşanly önümleri öndürýän kärhana eýe boldy. Foruma gatnaşan türkmen we daşary ýurt hünärmenlerine diplomlar gowşurylan şatlykly pursatlar hem hemmelerde ýakymly täsirleri galdyrdy.Hormatly Prezidentimiz «Ýaşlar — Watanyň daýanjy» atly kitabynda: «Ösüşiň täze belentliklerine tarap ynamly öňe barýan Türkmenistan döwletimiz bagtly, bagtyýar çagalaryň mekanydyr» diýip belleýär. Bu hakykat paýtagtymyzda ýokary guramaçylyk derejesinde we gyzykly geçen «Kids EXPO: ähli zat çagalar üçin» atly halkara sergi-ýarmarkada hem öz beýanyny tapdy. Ýurdumyzyň käbir ministrlikleriniň, Gökdere jülgesinde ýerleşýän çagalar sagaldyş-dynç alyş merkezleriniň, hususy önüm öndürijileriň pawilýonlary myhmanlarda ýatdan çykmajak täsirleri galdyryp, ýaş nesliň döwrebap bilim almagy, okuwyndan boş wagtlaryny şadyýan geçirmegi ugrunda amala aşyrylýan işleriň bimöçber köpdügini ýene bir gezek ähli aýdyňlygy bilen subut etdi. Telekeçilerimiz tarapyndan çagalaryň sagdyn ösmegi nazara alnyp öndürilen iýmit önümleriniň, dürli ýaşdaky oglandyr gyzlara niýetlenen egin-eşikleriň, oýnawaçlaryň ýany köp adamly boldy. Şeýle-de bu sergi-ýarmarka dünýä ýurtlarynyň birnäçesinden myhmanlar, degişli hünärmenler gatnaşdylar.

— Türkmenistanda ilkinji gezek bolýandygymyza garamazdan, biz bu ýerde doganlyk ruhy bilen gurşaldyk. Sebäbi halklarymyzyň taryhynda-da, häzirki wagtdaky gatnaşyklarynda-da, dilinde-de, medeniýetinde-de, däp-dessurynda-da örän ýakynlyk bar. Ine, Aşgabat şäherinde geçirilen bu gezekki sergi-ýarmarkada-da muňa ýene bir gezek göz ýetirdik. Şeýle-de şu serginiň türkmenistanly we beýleki ýurtlardan gelen kärdeşlerimiz bilen pikir alyşmakda, tejribämizi paýlaşmakda, hyzmatdaşlyk etmekde aýratyn ähmiýetli bolandygyny nygtamak isleýärin. Alyp barýan işimiz barada aýtsam, biziň «Shirintoy» kompaniýamyz çagalar üçin dürli görnüşli oýnawaçlary öndürýär. Olary Russiýa, Gyrgyzystan, Gazagystan, Azerbaýjan ýaly ýurtlara eksport hem edýäris. Häzirki wagtda kompaniýada 200-den gowrak adam zähmet çekip, dürli ölçegdir reňkdäki oýnawaçlaryň 100-e golaý görnüşini alyjylara hödürlemek başardýar. Aşgabatda geçirilen özboluşly sergi-ýarmarkada öz önümlerimizi görkezmegimiz biziň üçin uly hormat. Çagalara bagyşlanan bu halkara çäräniň dowam edýän günlerinde Özbegistan Respublikasynyň Prezidenti Şawkat Mirziýoýewiň Türkmenistana gelmegi, ýokary derejeli Türkmenistan — Azerbaýjan — Özbegistan duşuşygyna gatnaşmagy ýurtlarymyzyň arasyndaky dostlukly gatnaşyklary has-da berkiden waka hökmünde bizi örän begendirdi. Sözümiň ahyrynda sergi-ýarmarkany ýokary derejede gurandygy, şeýle hem bildirilen myhmansöýerlik üçin türkmen doganlarymyza tüýs ýürekden sagbolsun aýdýaryn — diýip, Özbegistandan «Shirintoy» kompaniýasynyň direktorynyň orunbasary Ilýas Jumaýew söhbetdeş bolanymyzda aýtdy.

Sergi-ýarmarka ýerli önüm öndürijileriň, täze programmalary döredijileriň has-da işjeň gatnaşmagy Gahryman Arkadagymyz tarapyndan başy başlanan beýik işleriň häzirki wagtda hormatly Prezidentimiziň baştutanlygynda üstünlikli dowam etdirilýändigini alamatlandyryp, çagalaryň hemmetaraplaýyn üns-alada bilen gurşalandygynyň güwäsi boldy.

— Biziň bu işläp taýýarlan programmamyz «Memo» diýlip atlandyrylyp, ol iňlis dilindäki «memory» sözünden gelip çykýar. Oňa beýle at goýmagymyzyň sebäbi QR koda birleşdirilen wideolary görüp bolýandygy bilen baglydyr. Biz bu programmany, esasan, öň gören wideolaryňy täzeçe usulda ýatlamak üçin döretdik. Şu gezekki geçirilýän sergi-ýarmarka üçin her hili reňkdäki köýnekleri öndürdik. Olaryň öň tarapynda şol goýlan wideodan bir bölek suraty ýerleşdirdik. Köýnegiň eteginde bolsa şol ýazgynyň QR koduny goýduk. Şeýlelik bilen, el telefonyň kamerasyny açyp, kody surata düşürip, soňra bolsa surata tutsaň, şol wideo kamerada seniň köýnegiň ýüzünde dowam edip başlaýar. Bir ýarym ýyllap zähmet siňdirenimizden soňra, bu programmany döretmegiň hötdesinden geldik. Biziň bu işimiz myhmanlar tarapyndan oňat garşylandy. Esasanam, çagalar muňa gyzyklanma bildirýärler — diýip, «Memo» programmasyny işläp taýýarlan Şyhy Şyhyýew gürrüň berdi.

«Kids EXPO: ähli zat çagalar üçin» atly halkara sergi-ýarmarkanyň ýapylyş dabarasynyň ahyrynda oňa gatnaşyjylar hormatly Prezidentimiziň adyna Ýüzlenme kabul etdiler.

Baýnazar BAÝHANOW.

 Çeşme: «Türkmenistan» gazeti. 25.08.2025  Surata düşüren Hasan MAGADOW.