TSSE Täzelikler

Türkmenistan bilen Türkiýe Respublikasynyň arasyndaky ikitaraplaýyn söwda-ykdysady hyzmatdaşlygy giňeltmekde, harytlaryň eksportyny artdyrmakda, türk kompaniýalary hem-de maýadarlary bilen işewür hyzmatdaşlygy mundan beýläk-de ösdürmekde, daşary ýurt maýa goýumlaryny milli ykdysadyýetimize giňden çekmekde ýakynda Türkiýe Respublikasynyň Ankara şäherinde geçirilen Türkmen-türk işewürlik maslahaty täze hyzmatdaşlyklara giň ýol açar.

Türkiýe Respublikasyna resmi saparynyň çäklerinde hormatly Prezidentimiz Arkadagly Gahryman Serdarymyzyň  Türkiýäniň Palatalar we biržalar birleşiginiň Merkezi edara binasynda geçirilen Türkmen­türk işewürlik maslahatyna gatnaşmagy bu giň möçberli çäräniň ähmiýetini has-da artdyrdy.

Arkadagly Gahryman Serdarymyzyň  Türkmen-türk işewürler maslahatynda eden çykyşynda: «Biz iki tarap üçin hem bähbitli bolan netijeli pikirleridir teklipleri hoşallyk bilen kabul etmäge taýýardyrys. Ýurtlarymyzyň, hususan-da, işewür toparlarymyzyň bu meselelere tagalla bilen çemeleşjekdiklerine ynanýaryn» diýmegi türkmen-türk gatnaşyklarynda täze sahypany açdy.

Türkmen-türk işewürler maslahatynda Türkiýe Respublikasynyň Senagat we tehnologiýa ministri Mehmet Fatih Kajyr, Türkiýäniň Palatalar we Biržalar birleşiginiň başlygy Rifat Hisarjyklyogly, Türkiýe Respublikasynyň Ulag we infrastruktura ministri Abdulkadir Uralogly, Türkiýe Respublikasynyň Daşary ykdysady aragatnaşyklar komitetiniň Nail Olpak hem-de «Çalyk Holding» kompaniýalar toparynyň dolandyryjylar geňeşiniň başlygy Ahmet Çalyk dagy çykyş edip, türkmen-türk hyzmatdaşlygyny pugtalandyrmagyň we onuň gerimini giňeltmegiň täze mümkinçiliklerini aýratyn bellediler. 

         Şeýle hem Türkmen-türk işewürler maslahatynda Türkmenistanyň Senagatçylar we telekeçiler birleşiginiň agzalary bilen Türkiýe Respublikasynyň kompaniýalarynyň arasynda birnäçe şertnamalara gol çekilmegi bu giň möçberli çäräniň örän netijeli bolandygyna aýdyň şaýatlyk edýär.

Türkmenistanyň Söwda-senagat edarasynyň

Metbugat gullugy.