TSSE Täzelikler

2023-nji ýylyň 25-nji oktýabrynda Türkmenistanyň Söwda-senagat edarasynyň binasynda türkmen-saud duşuşygy geçirildi. Duşuşyga türkmen tarapyndan Türkmenistanyň Söwda-senagat edarasynyň «Söwda öýi» kärhanasynyň direktory S.Kepbanowyň ýolbaşçylygynda «Söwda öýi» kärhanasynyň Marketing we bazar öwreniş bölüminiň baş hünärmeni M.Igdirowa, edaranyň hukuk bölüminiň esasy hünärmeni G.Hojaýewa dagy wekilçilik etdiler. Saud tarapyndan bolsa, Daşary söwda boýunça Baş edarasynyň başlygynyň orunbasary: AbdulAziz Al Akyl, Daşary söwda boýunça Baş edarasynyň müdüri Halid Al Şuaýbi hem-de Saud  Arabystany Patyşalygynyň Türkmenistandaky ilçihanasynyň 3-nji sekretary Surur Al Sufýani dagy gatnaşdylar .

Türkmen-saud hyzmatdaşlygyny ösdürmek meselesi gün teribine goýlan bu duşuşykda «Söwda öýi» kärhanasynyň direktory S.Kepbanow Türkmenistanyň Söwda-senagat edarasynyň alyp barýan işleri bilen tanyşdyrdy. Ýurdumyzyň eksport kuwwatyny artdyrmak maksady bilen,  ýokary hilli dokma we haly önümlerini eksport etmegiň mümkinçiliklerini belledi. Şeýle hem Edaranyň agzalary bolup durýan telekeçilere we kärhanalara goldaw bermekde, olaryň alyp barýan işleriniň katalogyny elektron görnüşinde hem-de hat üsti bilen ugradyp bilýändigi barada habar berdi. Türkmen telekeçileriniň Saud Arabystan Patyşalygynyň bazaryna girmäge uly gyzyklanma bildirýändiklerini aýratyn aýtdy.

Saud Arabystany Patyşalygynyň Daşary söwda boýunça Baş edarasynyň başlygynyň orunbasary AbdulAziz Al Akyl hem öz gezeginde Türkmenistanda öndürilýän önümlere uly gyzyklanma bildirip, türkmen işewürleriniň işjeň alyp barýan hyzmatlary bilen içgin tanyşmak maksady bilen, olaryň resmi sahypalaryna  gyzyklanma bildirdi. Şeýle hem Türkmenistanyň Söwda-senagat edarasynyň agzalarynyň öz öndürýän önümleri we alyp barýan işleri barada kataloglaryna garaşýandygyny aýtdy. Iki döwletiň arasynda hyzmatdaşlygy ösdürmek üçin, Saud Arabystany Patyşalygynyň Söwda-senagat kärhanasynyň türkmen önümleri we hyzmatlary bilen tanyşdyrylmagyny maksadalaýyk hasaplaýandygyny belledi.

Iki dostlukly döwletiň işewürleriniň hyzmatdaşlyklaryny mundan beýläk-de ösdürmek, kämilleşdirmek maksady bilen, hödürlenen teklipleri we bellikleri göz öňünde tutup, Edaranyň agzalarynyň sanawynyň, olaryň öndürýän önümleriniň we hyzmatlarynyň kataloglarynyň elektron hem-de hat görnüşinde gysga wagtyň dowamynda gowşuryljakdygy habar berildi.

Türkmenistanyň Söwda-senagat edarasynyň

Metbugat gullugy.