TSSE Täzelikler

Türkmenistanyň Söwda-senagat edarasynyň sergi zalynda iki günläp dowam eden Telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel – 2023» atly XVI halkara sergisi we ylmy maslahaty öz işini üstünlikli tamamlady.

Serginiň we ylmy maslahatyň jemleýji gününde aragatnaşyk, hemra tehnologiýalary, ykdysadyýetde sanly goşundylar we hyzmatlar, sanly öwrülişik hem-de sanly jemgyýeti ösdürmek bilen bagly meseleler boýunça tejribeler paýlaşyldy. Şeýle hem, bu giň gerimli halkara serginiň we ylmy maslahatyň çäginde «Sanly çözgüt ─ 2023» atly innowasion taslamalar bäsleşiginiň jemleri jemlenip ýeňijilere gymmat bahaly sowgatlar hem-de diplomlar gowşuryldy.

«Türkmentel ─ 2023» atly XVI halkara sergisiniň we ylmy maslahatyň barşynda bu ulgamda hyzmatdaşlyklary giňeltmek we pugtalandyrmak maksady bilen, resminamalara gol çekmek hem-de degişli güwänamalaryň gowşurylyş dabarasy boldy.

Halkara sergisine we ylmy maslahatyna gatnaşyjylar Hormatly Prezidentimiz ─ Arkadagly Gahryman Serdarymyza bu giň möçberli çäräni ýokary derejede geçirmäge döredip beren ajaýyp mümkinçilikleri üçin çäksiz hoşallyklaryny aýdyp, Ýüzlenme kabul etdiler.

Türkmenistanyň Söwda-senagat edarasynyň

Metbugat gullugy.