TSSE Täzelikler

2023-nji ýylyň 9-njy noýabrynda Türkmenistanyň Söwda-senagat edarasynyň döwrebap binasynda açylan Telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel – 2023» atly XVI halkara sergisi we ylmy maslahaty dowam edýär.

 Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentligi tarapyndan guralýan bu giň möçberli çäräniň çäklerinde geçirilýän ylmy maslahatlarda, duşuşyklarda, şeýle hem okuw sapaklarynda dünýäniň dürli künjeklerinden oňa gatnaşýan hünärmenlere telekommunikasiýa, innowasiýa we ýokary tehnologiýa pudagynda özara tejribe we täze pikirler alyşmaga mümkinçilikler döredilýär.

 Maglumat we ylmy-tehnologiki taýdan ähmiýetli, ýokary derejeli bu halkara çäresine  Türkmenistan, Russiýa, ABŞ, Finlýandiýa, Türkiýe, Latwiýa, Fransiýa, Monako, Niderland Patyşalygy, Germaniýa, Şweýsariýa, Awstriýa, Ýaponiýa, Şwesiýa, Beýik Britaniýa, Taýland Patyşalygy, Hindistan, Päkistan, Belarus, Özbegistan, Gyrgyz, Gazagystan, Owganystan, Azerbaýjan, Hytaý, Birleşen Arap Emirlikleri ýaly, dünýäniň 30-a golaý ýurdundan 80-ne golaý kompaniýanyň 200-den gowrak wekilleri gatnaşýar. 

 Ýurdumyzdan we daşary ýurtlardan bu halkara çäresine gatnaşýan alymlar, bilermenler, işewürler we halkara guramalaryň wekilleri sanly transformasiýa, kiberhowpsuzlyk, kommunikasiýanyň geljegi, hemra tehnologiýalary ýaly ugurlarda mundan beýläk hem halkara hyzmatdaşlygyny ösdürmek, sanly ösüşde döwlet strategiýasy bilen bagly meseleleri ara alyp maslahatlaşýarlar.  

Türkmenistanyň Söwda-senagat edarasynyň

Metbugat gullugy.