TSSE Täzelikler

         2026-njy ýylyň  3-nji iýunynda Türkmenistanyň Söwda-senagat edarasynyň maslahatlar zalynda  tegelek stol görnüşindäki Türkmen-amerikan işewürlik maslahaty geçirildi.  Gahryman Arkadagymyzyň başlangyjy bilen döredilip, 18 ýyl bäri hereket edýän Türkmen-amerikan işewürler geňeşiniň  bu gezekki maslahatynyň umumy bölümi iki döwletiň arasyndaky hyzmatdaşlygyň häzirki sepgidine we geljekki ösüş ugurlaryna bagyşlandy.

     Maslahatyň açylyşynda Türkmenistanyň Ministrler Kabinetiniň Başlygynyň orunbasary Nokerguly Atagulyýew giriş sözi bilen çykyş etdi. Ol öz çykyşynda iki ýurduň arasyndaky ykdysady hyzmatdaşlygyň strategik ähmiýetini we täze şertlerde söwda gatnaşyklarynyň gerimini giňeltmek üçin bar bolan uly mümkinçilikleri belläp geçdi.

     Türkmen-amerikan işewürler geňeşiniň direktory Erik Stýuart öz çykyşynda amerikan kompaniýalarynyň türkmen bazaryna bolan gyzyklanmasynyň yzygiderli artýandygyny nygtady.

    ABŞ-nyň Türkmenistandaky Adatdan daşary we Doly ygtyýarly Ilçisi Elizabet Rud ikitaraplaýyn gatnaşyklaryň täze ugurlaryny goldamaga taýýardyklaryny mälim etdi.

    Işewürlik maslahatynyň dowamynda «Türkmenistanyň we Amerikanyň Birleşen Ştatlarynyň söwda-ykdysady we maýa goýum mümkinçilikleri: energetika, senagat, aragatnaşyk, oba hojalyk ulgamlarynda hyzmatdaşlyk» atly ýörite sessiýa guraldy. Sessiýada çykyş eden wekiller taraplaryň anyk pudaklar boýunça tejribe alyşmaga we bilelikdäki taslamalary amala aşyrmaga taýýardyklaryny görkezdiler.

     Sessiýanyň ahyrynda myhmanlar ýörite gurnalan sergä tomaşa etdiler. Soňra iki ýurduň döwlet hem-de hususy pudaklarynyň wekilleriniň arasynda göni B2B duşuşyklary geçirildi.

      Geçirilen gepleşikler we gazanylan ylalaşyklar Türkmenistan bilen ABŞ-nyň arasyndaky ykdysady gatnaşyklaryň täze, has ýokary sepgide çykjakdygynyň we geljekki taslamalaryň durnukly ösüşine uly itergi berjekdiginiň subutnamasy boldy. Maslahat öz işini üstünlikli tamamlady.

                                                         Türkmenistanyň Söwda-senagat edarasynyň

                                                                                                     Metbugat gullugy.