TSSE Täzelikler

     2026-njy ýylyň 20-nji iýunynda Türkmenistanyň Söwda-senagat edarasynda Malaýziýanyň nebit-gaz, energetika we infrastruktura pudagynda öňdebaryjy inženerçilik hem-de maslahat beriş kompaniýasy bolan "Tuah Consult Sdn. Bhd." guramasynyň ýolbaşçysy jenap Ir. Azan bin Zaýnuddin bilen resmi duşuşyk geçirildi.

    Duşuşygyň başynda  Türkmenistanyň Söwda-senagat edarasynyň ýolbaşçysy iki ýurduň arasyndaky syýasy-ykdysady hyzmatdaşlygyň giň gerime eýe bolmagynda Türkmenistanyň Hormatly Prezidentiniň hem-de Türkmen halkynyň Milli Lideriniň yzygiderli tagallalarynyň özara bähbitli gatnaşyklary täze belentliklere alyp barýandygyny aýratyn nygtady.     

   Häzirki wagtda ikitaraplaýyn gatnaşyklaryň ýokary derejede işjeňleşmeginde Malaýziýanyň öňdebaryjy kompaniýalarynyň saldamly goşant goşýandygy bellenilip, Türkmenistanyň Söwda-senagat edarasynyň iki ýurduň telekeçileriniň arasynda göni hyzmatdaşlygy ýola goýmakda durnukly işleri durmuşa geçirýändigi mälim edildi. TSSE tarapyndan guralýan bilelikdäki biznes-forumlar, pudaklaýyn sergiler we B2B  duşuşyklar özara hyzmatdaşlygy artdyrmaga ýardam edýär.

   Gatnaşyjylar Malaýziýanyň ösen innowasion, tehnologik, taslama dizaýny we desgalary dolandyrmak ýaly maslahat beriş tejribesiniň Türkmenistanyň hususy hem-de döwlet sektorlarynyň, aýratyn-da energetika pudagynyň ünsüni çekýändigini tassykladylar. Türkmen tarapy "Tuah Consult Sdn. Bhd." ýaly baý halkara tejribesi bolan kompaniýanyň Türkmenistanyň söwda-ykdysady hem-de nebit-gaz bazaryna işjeň goşulmagyny we bilelikdäki taslamalary durmuşa geçirmegini tüýs ýürekden goldamaga taýýardygyny bildirdi.

     Bu duşuşyk iki ýurduň arasyndaky ykdysady gatnaşyklaryň has-da berkemegine, nebit-gaz we gurluşyk senagaty pudagynda döwrebap innowasiýalaryň giňden ornaşdyrylmagyna täze itergi berer.

                                                         Türkmenistanyň Söwda-senagat edarasynyň

                                                                            Metbugat gullygy.