TSSE Täzelikler

      2026-njy ýylyň 19-njy iýunynda  “Türkmenistan–Malaýziýa: nebitgaz pudagynda özarabähbitli hyzmatdaşlyga 30 ýyl” atly halkara ylmy-amaly maslahytynyň çäklerinde türkmen-malaý hyzmatdaşlygyna bagyşlanan sergi badalga aldy. Sergini Türkmenistanyň Nebitgaz toplumy we Türkmenistanyň Söwda-senagat edarasy bilelikde gurnaýar.

    Çäräniň baş maksady, uly üstünliklere beslenen 30 ýyllyk hyzmatdaşlygyň, aýratyn-da Malaýziýanyň döwlet nebit-gaz kompaniýasy "Petronas" bilen bilelikde durmuşa geçirilen iri taslamalaryň netijelerini seljermekden ybaratdyr. Sergi meýdançasynda kompaniýanyň Hazar deňziniň türkmen böleginde alyp baran gözleg, buraw we önümçilik işleriniň ägirt uly netijeleri, gazanylan üstünlikler sanly maglumatlar arkaly  görkezilýär.

    Malaýziýanyň öňdebaryjy kompaniýalary çäräniň dowamynda nebit we gaz çykarmak, ony gaýtadan işlemek pudagyna degişli iň döwrebap tehnologik çözgütlerini tanyşdyrýarlar. Esasy üns önümçilige sanly ulgamy ornaşdyrmak, gazylyp alynýan serişdeleri ekologik taýdan arassa usullar bilen gaýtadan işlemek ýaly energetikanyň gelejegine degişli temalara gönükdirilýär.

     Gatnaşyjylar diňe önümçilik we eksport bilen çäklenmän, hyzmatdaşlygyň ynsanperwer we ylmy ugurlaryna hem ünsi çekýärler. Ýangyç-energetika pudagy üçin ýokary derejeli milli hünärmenleri bilelikde taýýarlamak hem-de iki ýurduň alymlarynyň gatnaşmagynda ylmy barlaglary utgaşykly alyp barmak boýunça geljekki strategik ädimler ara alnyp maslahatlaşylýar.

    Türkmenistan bu halkara platformanyň üsti bilen  özüniň ägirt uly ýangyç-energetika mümkinçiliklerini we maýa goýum şertlerini bütin dünýä görkezýär.        Çärede  diňe bir bar bolan işleri dowam etdirmek däl, eýsem malaýziýaly we beýleki halkara hyzmatdaşlar bilen täze bilelikdäki taslamalara badalga bermek göz öňünde tutulýar.

    Bu iri çäre Türkmenistanyň energetika diplomatiýasynyň halkara derejesindäki abraýyny has-da berkitmäge we sebitde durnukly ykdysady ösüşi üpjün etmäge goşant goşar.

           Türkmenistanyň Söwda-senagat edarasynyň

                             Metbugat gullugy.